Elbasynyń tikeleı tapsyrmasymen 2017 jyldan bastap elimizdiń jastary tegin kásiptik-tehnıkalyq bilim ala bastady. Qazirgi tańda «Barshaǵa arnalǵan tegin kásiptik-tehnıkalyq bilim» baǵdarlamasy aıasynda kolledjderde 25 myńǵa jýyq stýdent bilim alyp jatyr. Qysqa ýaqytta naqty kásipti meńgerip shyǵatyn jastar endi el ekonomıkasyna edáýir serpin bereri anyq.
Elimiz boıynsha 817 kásiptik bilim beretin kolledjdiń 83-i Almaty qalasynda ornalasqan. Solardyń biri Energetıka jáne elektrondy tehnologııalar kolledji bıyl memlekettik tapsyrystan bólek, tegin kásiptik bilim baǵdarlamasy boıynsha 50 balany oqýǵa qabyldaǵan. Sonymen qatar memlekettik baǵdarlama aıasynda uıymdastyrylǵan qysqa merzimdi kýrstarda 24 adam daıyndyqtan ótip, jumysqa ornalasypty. «Bul jerde bilim salasyndaǵy jańa baǵdarlamaǵa saı jobalar júzege asyrylýda. Tegin kásiptik-tehnıkalyq bilim berý mekemelerinde jańa tehnologııalar men ádisterdi qoldaný úshin oqytýshylar qaıta daıyndyqtan ótti», deıdi BǴM kásiptik-tehnıkalyq bilim berý departamentiniń dırektory Nasymjan Ospanova.
Baǵdarlamaǵa oqý oryndaryna túspegen, jumys izdegen 9-11 synyp bitirýshileri, ómirde qıyn jaǵdaıǵa tap bolǵandar jáne az qamtylǵan otbasy músheleri, sondaı-aq jumyspen qamtý ortalyqtarynda tirkelýine qaramastan 29 jasqa deıingi jumyssyz jastar jáne ózin-ózi jumyspen qamtyǵandar qatysa alady. Sondaı-aq baǵdarlamanyń qatysýshylary stıpendııamen, bir rettik ystyq tamaqpen, tegin jol júrýmen qamtamasyz etiledi.
Nátıjeli jumyspen qamtý jáne jappaı kásipkerlikti damytýǵa baǵyttalǵan baǵdarlamada tek naryqta suranysqa ıe mamandyqtarǵa basymdyq berilgen. «Eki top qabyldap otyrmyz. Bireýi elektrmontajshy mamandyǵy boıynsha, ekinshisinde IT tehnologııa, dızaıner degen mamandyq boıynsha daıyndap jatyrmyz. 50 adam tegin tamaqpen qamtamasyz etiledi. Olarǵa mindetti túrde úlgerimine qaraı shákirtaqy beremiz», deıdi Almaty qalasyndaǵy energetıka jáne elektrondy tehnologııalar kolledjiniń dırektory Tóleýǵalı Taıtóleev.
Bilim jáne ǵylym mınıstrligi kásiptik-tehnıkalyq bilim berý departamentiniń dırektory Nasymjan Ospanovanyń aıtýynsha, atalmysh kolledjde dýaldy bilim berý júıesi iske asyrylýda. Sondyqtan bolashaqta stýdentterdiń jumysqa ornalasýynda eshqandaı kedergi bolmaıdy. «Jyl saıynǵy kórsetkishterge súıenetin bolsaq, kolledj stýdentteriniń 90 paıyzy eki qolǵa bir kúrek tabady.
Sondaı-aq olar Almatynyń ǵana emes, elimizdiń basqa óńirlerinde de jumyssyz júrmeıdi», dedi Bilim jáne ǵylym mınıstrligi kásiptik-tehnıkalyq bilim berý departamentiniń dırektory Nasymjan Ospanova.
Bilim jáne ǵylym mınıstriliginiń málimetinshe, atalǵan baǵdarlamaǵa memleket tarapynan 4 mlrd 300 mln teńge qarjy qarastyrylǵan. Qazirgi ýaqytta 200 ustaz shetelde biliktiligin arttyrýda. Al baǵdarlama boıynsha 2021 jylǵa deıin 700 myńnan astam adamdy tegin kásiptik bilimmen qamtý josparlanǵan.
Gúljazıra SAILAÝOVA