Elimiz boıynsha qolyna qarý ustap, batysqa attanǵan bozdaqtardyń sany 1 mıllıon 200 mynadaı bolsa, tórtten biri Ýkraınany azat etý joryqtaryna qatysqan eken.
Solardyń biri– soltústikqazaqstandyq Áıip Ramazanov. Esepshilik qyzmet atqaryp júrgen ol tepse temir úzetin eki múshel shaǵynda alǵash ret nemis basqynshylarmen betpe-bet kezdesedi. Talaı qandy shaıqastardy basynan ótkerip, birinde qaza tabady. Keıin týǵan-týystary qansha izdeý salsa da, «habar-osharsyz ketti» degen qysqa ǵana jaýap alyp otyrady. Bıyl kúzde Berezan qalasy mańynda júrgizilgen qazba jumystary barysynda eki jaýyngerdiń súıegi tabylady. Ýkraınanyń qaýipsizdik qyzmeti akademııasynyń kýrsanttary uıymdastyrǵan ekspedısııa medalondaǵy jazbalar arqyly qazaq soldaty Áıip Ramazanov ekenin anyqtaıdy.
Kıevtegi Ofıserler úıinde qyzyl ásker jaýyngeriniń máıiti Qazaqstan elshiligine tapsyrylyp, Qazaqstannyń osyndaǵy tótenshe jáne ókiletti elshisi Samat Ordabaev óz sózinde bul aksııa tarıhymyzdy qasterleýdiń, otan úshin ot keshken baýyrlarymyzǵa kórsetilgen erekshe qurmet ekenin jetkizdi. Osylaısha ekijaqty kelisim aıasynda atqarylǵan shara barysynda batyrdyń denesi týǵan jerine jetkizilip, jerlendi. Marqumdy jer qoınyna tapsyrý rásimine aýyldastary men týystary, ishki ister, qorǵanys isteri jónindegi departamentterdiń, Ulttyq ulan Petropavl áskerı ınstıtýtynyń ókilderi jınalyp, aýyldyq memorıalǵa gúl shoqtaryn qoıdy. Arýaqtarǵa taǵzym etti.
Aǵamnyń ata-anasy qashan kózderi jumylǵansha uldarynyń tiri oralatyna sendi, batys jaqqa qaraılaýmen ótti. Soǵys jyldary Orman dep atalǵan qazirgi Lenın eldi mekeninen soǵysqa 95 azamat attanyp, 61 ǵana aman-esen oralǵan, deıdi nemere qaryndasy Kúlbarshyn Qamyspaeva.
О́mir Esqalı,
«Egemen Qazaqstan».
Soltústik Qazaqstan oblysy