Sanaýly kúnderden keıin taǵy bir jyldy esendikpen shyǵaryp salamyz. Amandyqpen tabaldyryqtan attaǵaly turǵan Jańa jyl Qazaqstannyń turǵyn úı qurylys jınaq bankiniń myńdaǵan salymshysy úshin qonys toımen bastalady.
Bıyl «Nurly jer» baǵdarlamasy aıasynda Turǵyn úı qurylys jınaq banki 8 672 páterli 145 úıdi paıdalanýǵa berdi. Qurylys áli de jalǵasýda. Munan bólek kelesi jyly 100 kóp páterli turǵyn úı men 400-den astam jekemenshik kottedj ıelerin tabady. Ońtústik Qazaqstan oblysynda – 1 630 páter, Qostanaı oblysynda – 1 260 páter, Mańǵystaý oblysynda 1 068 páter ıeleriniń «óz úıi, óleń tósegi» bolady.
Eger «Nurly jer» baǵdarlamasy alty baǵytty qamtıtyn bolsa, sonyń kóp bóligi Qazaqstannyń turǵyn úı qurylys jınaq bankiniń qatysýymen júzege asyp otyr. Qoljetimdi, sharshy metri jeńildetilgen baǵamen beriletin baspanaǵa qol jetkizý úshin aldymen bankke salymshy bolyp, alǵyń kelgen páter qunynyń 30 paıyzyn jınaqtaý qajet. Bul memlekettik baǵdarlamaǵa qatysýshy 5 paıyzdyq jeńildikpen beriletin zaemǵa ıek arta alady. Bul jerde baspanaǵa muqtaj adamdardyń múddesi úshin jergilikti ákimdikter jumys istep, merdiger kompanııalardy izdestirip otyrǵanyn aıta ketý kerek.
Qysqasy, aıaqtalyp kele jatqan 2017 jyldyń kórsetkishine kóz salsaq, bıyl 8 672 otbasy turǵyn úı qurylys jınaq júıesi arqyly armandaǵan jeke páterlerine kirdi.
Baspanaly bolýdyń qadirin, jyldar boıy árkimniń páterin jaǵalap, jaldap júrgender jaqsy biledi. Tapqan jalaqynyń da kóp bóligi osyǵan jumsalatyny belgili. Úı bolmasa kúıdiń de bolmaıtynyn baıandap otyrýdyń ózi artyq. Mundaı jaǵdaıda eń keregi de táýekel men turǵyn úı qurylys júıesine senim artý.
Máselen, bıyl bes balasymen jańa jyldy jańa úıde qarsy alǵan Aqtóbe oblysy Qaraoı selosyndaǵy Amangeldi Ysmaǵulovtyń da oqıǵasy baspanaly bolýdy kóksep júrgen kóbimizdiń jaǵdaıymyzǵa uqsas. 2013 jyly bul otbasy Qazaqstannyń turǵyn úı qurylys jınaq banki arqyly depozıt ashyp, aı saıyn 50 myń teńgeden salyp otyrǵan. Bıyl olar Aqtóbe qalasynan 2 bólmeli páterge qol jetkizdi. Árıne, osy aralyqta olardyń úlken balalary stýdent bolyp, iri qalalarǵa oqýǵa ketse, qalǵany úshin osy úı de – qut. Ysmaǵulovtar nesıeni 6 jylǵa alǵan, endi aıyna 60 myńnan tólep otyrady. Bul – aımaqtardaǵy bir ǵana mysal.
– 2017 jyldyń basynda TQJB júıesinde 700 myńǵa tarta salymshy bolsa, qazirgi tańda bul kórsetkish 1 mıllıonnan asyp, olardyń salymdary 492 mıllıard teńgege jetti. Onyń ishinde 32 myń kelisimshartta salynyp jatqan úılerden satyp alýǵa qajetti páterdiń 30 paıyzy, ıaǵnı 172 mıllıard teńge jınaqtaldy. 2017 jyly 181 mlrd teńgeniń zaemy beriledi dep josparlansa, is júzinde 256 mlrd teńgege 37 myń zaem berilip, jyldyq jospar 141 paıyzǵa oryndaldy, – dep málimdedi Astanada ótken bıfıngte «Báıterek» UBH» AQ basqarýshy dırektory-basqarma múshesi Qaıyrbek О́skenbaev.
Eti tiri qazaqstandyqtardyń mundaı qulshynysy TQJB jumysyn aıtarlyqtaı jandandyryp, endigi jerde bank 1 myń kelisimsharttyń ornyna kúnine rekordtyq 2,5 myń kelisimshartty resimdeýge kóshti. Jáne salymshylar sany aıtarlyqtaı kóbeıgenine qaramastan, bank óz qyzmetkerleriniń shtattyq birligin saqtap qaldy. Bul avtomattandyrýdyń arqasynda bolyp jatyr.
Máselen, onlaın-bankıngti qazir 300 myńǵa jýyq salymshy qoldanady. Iаǵnı onlaın arqyly jınaqtaryn qadaǵalap, qosylǵan syıaqyny kórip, depozıtti tolyqtyryp, nesıelerin sanaýly sekýndtarda jaýyp otyrady. Qazposhta, «e-gov.kz» portaly, Qiwi, Paypoint tólem termınaldary, ekinshi deńgeıdegi bankter men basqa da baılanystyń balama arnalary arqyly bıyl Qazaqstannyń turǵyn úı qurylys jınaq bankinde 1 mln 120 myńnyń tólemi jasalǵan. Bul qyzmetterdiń basym bóligi komıssııasyz júredi.
– Sondaı-aq kúzde biz «Baspana.kz» jyljymaıtyn múlik portalyn qosyp, «Nurly jer» baǵdarlamasynyń barlyq nysandaryn biriktirdik. Bul úılerdiń fotosýretteri men jobasyn kórsetetin jaı aqparattyq saıt emes. Portaldan salymshylar ózi tańdaǵan páterine birden ótinim bere alady. Eger ótinim maquldansa, salymshy bankke tek kelisimshartqa qol qoıý úshin ǵana keledi. Bul bizdiń «Sıfrly Qazaqstandy» damytýǵa qosqan úlesimiz, – deıdi QTQJB basqarma tóraıymy Lázzat Ibragımova.
Bilý mańyzdy. Eger oqyrman esinde bolsa, byltyr jyl aıaǵynda Qazaqstannyń turǵyn úı qurylys jınaq banki ár salymshynyń depozıtine 20% memlekettik syılyqaqy qosylatynyn málimdep, onyń jaı-japsaryn túsindirgen-di. Endeshe jınaqtalǵan qarajatqa qarajat bolyp ústemelenetin bul soma bıyl da salymshylarǵa beriledi. Bul syılyqaqy 200 AEK-ten, ıaǵnı 453 800 teńgeden aspaıtyn salymnyń somasy boıynsha esepteledi. Mysaly, siz bir jyl nátıjesinde shotyńyzǵa osyndaı aqsha salsańyz, depozıtińizge memleket tarapynan eń joǵary 90 760 teńge kólemindegi syılyqaqy beriledi. Eń bastysy, salymdy 29 jeltoqsannyń jumys kúni aıaqtalǵansha tolyqtyryp úlgerý kerek.
Aınash ESALI, «Egemen Qazaqstan»
ALMATY