Ońtústik Koreıa KHDR-ǵa shekara mańyndaǵy qarýsyzdandyrylǵan aımaqta joǵary deńgeıli kezdesý ótkizýdi usyndy. Basty maqsat – soltústikkoreıalyq sportshylardyń Phenchhandaǵy qysqy Olımpıada oıyndaryna qatysý jaıyn talqylaý.
«Ońtústik pen Soltústik Phenchhandaǵy Olımpıada oıyndaryn da, eki el arasyndaǵy qarym-qatynasty jaqsartý týraly mańyzdy máselelerdi de talqylaı alady», dedi Koreı Respýblıkasynyń ulttyq qaýymdastyq ister mınıstri Cho Men Gıýn. Onyń aıtýynsha kelissózder shekara mańyndaǵy Phanmýndjom eldi mekeninde ótýi múmkin.
Koreı Halyq Demokratııalyq Respýblıkasynyń kóshbasshysy Kım Chen Yn jańajyldyq quttyqtaýynda Soltústik Koreıa sportshylaryn Phenchhandaǵy qysqy Oıyndarǵa jiberýi múmkin ekenin aıtty.
Al Ońtústik Koreıa prezıdenti Mýn Chje In óz kezeginde Kım Chen Ynnyń sózderin jyly qabyl aldy. Sondaı-aq, Olımpıada kórshilermen qarym-qatynasty retteýdiń birden bir joly ekenin aıtty.
Qysqy Oıyndardy uıymdastyrý komıtetiniń basshysy Lı Hı Bıom KHDR sportshylarynyń qatysýy múmkin ekenin estigende qýanǵanyn aıtty. «Bul jańa jylǵa arnalǵan syılyq sekildi», dedi ol. KHDR men Koreıa Respýblıkasy mınıstrleriniń orynbasarlary deńgeıindegi kelissózder sońǵy ret 2015 jyldyń jeltoqsanynda ótken.
KHDR atynan qysqy Oıyndarǵa tek eki sportshy qatysýy múmkin. Olar: mánerlep syrǵanaýshylar Rıom Te Ok jáne Kım Chjý Sık.
KHDR qysqy Oıyndarǵa qatysý týraly ótinish berý merzimin ótkizip alǵan. Degenmen mánerlep syrǵanaýshylary Halyqaralyq Olımpıada komıtetiniń shaqyrýymen qatysa alady.
Ońtústik Koreıa men KHDR áli kúnge deıin araz elder. Sońǵy jyldary qos memleket birneshe ret beıbit dıalog ornatpaq (kóbine Seýldiń bastamasymen) bolǵan. Degenmen, oǵan Phenıannyń ıadrolyq baǵdarlamasy kedergi keltirdi. О́tken jyly Phenıan alty ıadrolyq synaq ótkizdi. Osy sebepti KHDR-ǵa túrli sanksııalar salyndy.
Jańajyldyq quttyqtaý sózinde Soltústik Koreıa basshysy Kım Chen Yn ıadrolyq túımeshek ylǵı da qolynda júretinin aıtty. Degenmen, ol óz elin «beıbit jáne ıadrolyq derjava memleket» dep atady. Ońtústik pen Soltústik arasyndaǵy qarym-qatynas bıyl Olımpıadaǵa baılanysty jaqsarýy múmkin ekenin de jasyryp qalmady.
«2018 Ońtústik úshin de, Soltústik úshin de mańyzdy jyl bolmaq. Soltústik óziniń qurylǵanyna 70 jyl tolǵanyn atap ótedi, al Ońtústik qysqy Olımpıada oıyndaryn uıymdastyrady. Biz eki el arasyndaǵy baılanysty retteýimiz kerek», dedi Kım Chen Yn.