Qazaqstanda kólik quraldaryn memlekettik tirkeýge alýdyń erejeleri ózgerdi, dep habarlaıdy Memlekettik qyzmet isteri jáne sybaılas jemqorlyqqa qarsy is-qımyl agenttiginiń baspasóz qyzmeti.
«Memlekettik nómirdi qaıta alý kezinde 30 kúnniń ishinde qaıtadan baj salyǵyn tólemeý úshin, (2018 jyldan bastap jyl saıynǵy AEK kóleminiń ósýine baılanysty 6 798 teńge) agenttiktiń nusqaýymen Salyq kodeksine ózgertýlermen tolyqtyrýlar engizildi. Jańa ereje aǵymdaǵy jyldan bastap jumys isteıdi», - dep jazylǵan vedomstvonyń Feısbýktegi paraqshasynda.
Vedomstvo túsindirýinshe, buryn azamattar avtokóligin esepten shyǵarǵan kezde jańadan tirkelgen kólikte eski memlekettik nómirin qaldyrý úshin 2,8 AEK kóleminde baj salyǵyn qaıta tóleıtin. Bul talap Arnaıy HQO nemese Ishki ister mınıstrliginiń tirkeý jáne emtıhan alý bólimshelerinde bolǵan kezde de qoıylatyn. Bir jylda ortasha eseppen 11 myńǵa jýyq azamat memlekettik nómirdi saqtaýǵa ótinim beredi, bul avtokólik quraldaryna 63 mln teńgeden asatyn memlekettik baj salyǵyna teń. Sonymen qatar joǵalǵan nemese iske jaramsyz avtomobıl nómirine mindetti túrde aldyńǵy jáne artqy nómirge (2 birlik) memlekettik baj salyǵyn tóleý qajet bolatyn, nemese kólikti qaıta tirkeý mindetteletin. Mysal keltire ketsek, memlekettik nómirlerdiń dýblıkatyn jasaý úshin ortasha eseppen jylyna 1,9 myń azamat 11 mln teńgeden astam qarjyǵa ótinish beredi eken. «Qosymsha shyǵyndardy boldyrmaý úshin, jańa Salyq kodeksine sáıkes avtokólik ıelerine memlekettik nómirge 6 798 teńgeniń ornyna 3 399 teńgege ótinim berý múmkindigi qarastyryldy», - delingen agenttik habarlamasynda.