Parlament Senaty Qarjy jáne bıýdjet komıtetiniń keńeıtilgen otyrysynda «1996 jylǵy 9 jeltoqsanda Nıý-Delıde jasalǵan Qazaqstan Respýblıkasynyń Úkimeti men Úndistan Respýblıkasynyń Úkimeti arasyndaǵy Qosarlanǵan salyq salýdy boldyrmaý jáne tabys pen kapıtalǵa salynatyn salyqtarǵa qatysty salyq salýdan jaltarýǵa jol bermeý týraly konvensııaǵa jáne Hattamaǵa ózgerister men tolyqtyrýlar engizý týraly Qazaqstan Respýblıkasynyń Úkimeti men Úndistan Respýblıkasynyń Úkimeti arasyndaǵy hattamany ratıfıkasııalaý týraly» zań jobasy qaraldy, dep habarlaıdy Qazaqstan Respýblıkasy Parlamenti Senatynyń Baspasóz qyzmeti.
Zań jobasymen «Qazaqstan» termınine ózgerister engizildi, sondaı-aq Kovensııadaǵy qazaqstandyq salyqtardyń ataýy qoldanystaǵy zańnamaǵa sáıkes naqtylandy.
Usynylyp otyrǵan ózgeristerde elderdiń ekonomıkalyq múddeleri eskerile otyryp, salyq salý máselelerin naqtylaý nemese qaıta qaraý kózdelip otyr. Odan basqa, ýaǵdalasýshy memleketterdiń rezıdenttigin aıqyndaýdy retteıtin baptardyń erejeleri de ózgeretin bolady.
«Aqparat almasý», «Salyqtardy jınaýǵa kómek» baptarynyń jekelegen erejeleri Ekonomıkalyq yntymaqtastyq jáne damý uıymynyń úlgi konvensııasyna sáıkes keltiriledi. «Jeńildikterdi shekteý» babyna salyqtan jaltarý deregi anyqtalǵanda jáne Konvensııanyń erejelerin asyra qoldanǵanda ishki zańnamany qoldanýǵa múmkindik beretin ereje engizildi.
Zań jobasy Palatanyń qaraýyna jiberildi.