Nıý-Iorkte Birikken Ulttar Uıymynyń shtab-páterinde Memleket basshysy Nursultan Nazarbaevtyń tóraǵalyǵymen Qaýipsizdik Keńesiniń «Jappaı qyryp-joıatyn qarýdy taratpaý: sharalar men senim» taqyryby boıynsha joǵary deńgeıdegi pikirtalas ótti. Jıyndy ashqan Elbasy senim sharalary jahandyq qaýipsizdikti qoldaýdyń, búkil planeta kóleminde beıbitshilik nyǵaıtýdyń asa mańyzdy elementi retinde kún tártibinen túspeýi tıis ekenin aıtyp, onyń tórt sebebin túsindirdi.
«Birinshiden, senim sharalary búkil adamzatqa jańa joıqyn soǵys qateri tóngen XX ǵasyrdyń ekinshi jartysynda jappaı joıylý qaýpiniń aldyn alý kezinde ózin-ózi aqtady. BUU Jarǵysynda «Bizdik basty mindetimiz ‒ keler urpaqty soǵys órtinen qutqarý» dep jazylǵan», deı kele Elbasy qazaqstannyń BUU júıesindegi shırek ǵasyr ishinde qarqyndy damý jolynan ótkenin atap ótti. «Biz ıadrolyq arsenal boıynsha álemdegi tórtinshi elder taratpaý jónindegi qozǵalystyń kóshbasshysyna aınaldyq. Iаdrolyq qarýdan jáne ıadrolyq derjava mártebesinen bas tartý bizdiń sanaly ári shynaıy tańdaýymyz jáne Qazaqstannyń barsha halqy qoldap, álemdik qoǵamdastyq laıyqty baǵasyn bergen erikti qadamymyz boldy. Búginde elimiz ıadrolyq qaýipsizdik salasyndaǵy barlyq irgeli halyqaralyq kelisimderdiń qatysýshysy bolyp otyr. Biz ıadrolyq qarýy joq memleket retindegi mártebemizdi zańdy túrde bekittik», dedi Elbasy.
Nursultan Nazarbaevtyń aıtýynsha, senim sharalarynyń búkil planeta kóleminde beıbitshilik nyǵaıtýdyń asa mańyzdy elementi retinde kún tártibinen túsirmeýdiń ekinshi sebebi - ózara senim ahýaly halyqaralyq yntymaqtastyqtyń jańa modelin qalyptastyrýǵa septigin tıgize alady. «MAGATE-niń Tómen baıytylǵan ýran bankiniń ashylýy ‒ osy yntymaqtastyqtyń jarqyn mysaly ári onyń júzege asýynyń kórinisi. Qazaqstan ıadrolyq qarýdy taratpaý rejimin nyǵaıtýǵa osylaısha kezekti úles qosty», dedi Memleket basshysy.
«Úshinshiden, Qazaqstannyń ıadrolyq qarýsyz joly ózge elderge úlgi ári tájirıbe túrǵysynan kómek bolar edi. Biz táýelsiz el bolyp, memleketimizdi nyǵaıttyq. Iаdrolyq qarýdan bas tartyp jáne ıadrolyq derjavalardan shabýyl jasamaý kepildigin alyp, joǵarǵy bedelge ıe boldyq. Osy rette, Soltústik Koreıa basshylyǵyn bizdiń jolymyzben júrýge shaqyramyz», dedi Prezıdent. Memleket basshysynyń ataǵan tórtinshi sebebi - ǵylymı-tehnologııalyq progrestiń qazirgi múmkindikteri jáne jahandanýdyń shynaıy bolmysy jappaı qyryp-joıý qarýlaryn taratpaý mindetin adamzattyń aman saqtalyp qalý máselesine aınaldyryp otyr.