Elbasy Nursultan Nazarbaev Polsha Respýblıkasynyń Prezıdenti Andjeı Dýdamen kezdesti, dep habarlady Qazaqstan Prezıdentiniń baspasóz qyzmeti.
Memleket basshysy áńgimelesý barysynda A.Dýdany Polshanyń BUU Qaýipsizdik Keńesiniń turaqty emes múshesi retindegi qyzmetiniń bastalýymen quttyqtady.
– Búgingi kezdesý qarym-qatynastarymyzdy talqylaý úshin bizge zor múmkindik beredi. Polshanyń Birikken Ulttar Uıymy Qaýipsizdik Keńesiniń 2018-2019 jyldardaǵy turaqty emes múshesi retindegi qyzmetiniń bastalýymen quttyqtaımyn, – dedi Qazaqstan Prezıdenti.
Nursultan Nazarbaev Qazaqstan men Polshanyń BUU Qaýipsizdik Keńesi jumysyndaǵy ustanymdarynyń uqsastyǵyn atap ótti.
– Bizdiń oı-pikirimiz ben Birikken Ulttar Uıymy Qaýipsizdik Keńesindegi jumys baǵytymyzdyń uqsas ekenine qýanyshtymyn. Meniń Varshavaǵa saparym jáne Sizdiń ótken jylǵy Astanaǵa saparyńyz áli esimde. Mundaı kezdesýler bizdi ári elderimizdi jaqyndata túsedi, – dedi Qazaqstan Prezıdenti. A.Dýda kezdeskenine jáne ekijaqty yntymaqtastyqtyń ózekti máselelerin talqylaý múmkindigi bolǵanyna rızashylyq bildirdi.
Sondaı-aq Memleket basshysy Birikken Ulttar Uıymynyń Bas hatshysy Antonıý Gýterrıshpen kezdesti. Áńgimelesý aldynda Nursultan Nazarbaev Birikken Ulttar Uıymynyń Qurmetti qonaqtar kitabyna qoltańba qaldyrdy. Kezdesý barysynda taraptar Qazaqstannyń BUU Qaýipsizdik Keńesindegi tóraǵalyǵymen baılanysty ózekti máselelerdi talqylady.