BUU Qaýipsizdik Keńesi prezıdenttiń osyǵan deıin aıtylyp kele jatqan málimdemesin qabyldady. Bul týraly Nursultan Nazarbaevtyń BUU Qaýipsizdik Keńesindegi debattaryn qorytyndylaǵan QR-nyń BUU janyndaǵy turaqty ókili Qaırat Omarov málim etti, dep habarlaıdy QazAqparat.
«Búgin Qaýipsizdik Keńesiniń prezıdenti - Qazaqstan. Nursultan Nazarbaev ótken jyldyń qańtar aıynda óz sózinde Qaýipsizdik Keńesine belgilegen 7 basymdyq bul málimdemege aımaqtyq kontekstte saqtandyrýshy dıplomatııa boıynsha engizildi. Qujatta ıadrolyq qarýsyzdandyrý, senim sharalary, BUU 100 jyldyǵyna qaraı soǵyssyz álem qurý máseleleri qarastyrylǵan.
Memleket basshysy belgilegen sharttar búgingi kúni qabyldandy. Mundaı málimdemeler kelisilip, ujymdyq turǵyda qabyldanýy úshin BUU Qaýipsizdik Keńesine múshe memleketterdiń maquldaýyna ıe bolýy kerek. Sondyqtan, bul málimdeme halyqaralyq birlestikter N.Nazarbaevtyń ıdeıasy men usynystaryn qabyldaıtynyn kórsetip otyr. Búgingi kúni onyń tájirıbelik turǵyda júzege asýynda bizdi birshama jumys kútip tur», - dedi ol qazaqstandyq tilshilerge bergen suhbatynda.
Dıplomat óz sózinde N.Nazarbaevtyń BUU Qaýipsizdik Keńesiniń orny - búkil adamzatqa qatysty beıbitshilik pen soǵys máselesi qozǵalatyn basty organdaǵy sóziniń tarıhı sıpaty baryn atap ótti. «Búgin myna alańda qazaq tilinde ún shyqty. Bul álemdik birlestikter úshin mańyzdy oqıǵa boldy dep aıta ketý kerek. Sebebi, bizdiń Memleket basshynyń beıbitshilikke den qoıǵan saıasatynyń róli úlken. Ol moıyndala otyryp, zor senimge ıe bolǵan. Bul halqymyz úshin maqtan tutarlyq oqıǵa», - deıdi ol. Qaırat Omarovtyń aıtýyna qaraǵanda, Nursultan Nazarbaev eń ózekti ári ótkir halyqaralyq máselelerge qatysty Qazaqstannyń ustanymyn naqty bildire otyryp, shıelenisterdiń sheshimin usynǵan.
«Memleket basshysy halyqaralyq birlestikterge óte mańyzdy messedj taratyp, qazirgi tańda senim sharalary negizinde qarym-qatynas ornatýǵa úndedi. Dál qazir senim sharalarynyń jetispeıtini kórinip tur. Al Qazaqstan BUU Bas Assambleıasy aıasynda 1992 jyly senim sharalary men birlese áreket etý boıynsha otyrysta osy ıdeıany bildirgen bolatyn. Al búgingi kúni osy senim sharalarynyń qajettiligi odan ary arta tústi. Memleket basshysy bul turǵyda saıası jigerdiń, memleket basshylarynyń arasynda senimniń jetpeı turǵanyn erekshe aıtyp ótti», - deıdi Qaırat Omarov. Ol óz sózin Qaýipsizdik Keńesiniń músheleri «Qazaqstannyń beıbitshilikke shaqyrǵan ustanymyn - halyqaralyq máselelerdi sheshýdegi shynaıy úlesi» dep bilip otyrǵanyn tilge tıek etti. «BUU Qaýipsizdik Keńesiniń minberinde Memleket basshysy belgilegen basymdyqtar men tapsyrmalar SIM-ge de, BUU janyndaǵy QR-nyń turaqty úkimetine de joǵary talap qoıady. Bizdiń tóraǵalyqtyń taqyryptary (jappaı qyrǵynǵa ushyratar qarýlardyń taratylmaýy, Aýǵanstan men Ortalyq Azııada aımaqtyq yntymaqtastyq qurý) BUU Qaýipsizdik Keńesine múshe elderdiń tarapynan úlken qoldaýǵa ıe boldy dese bolady. Búgin zalda otyrǵan adamdar Memleket basshysyn muqııat tyńdady. Ekinshi debatta bul suraqtar óte qyzý túrde talqylanatynyna senimdimin», - deıdi Qaırat Omarov.
Dıplomat óz sózinde BUU Qaýipsizdik Keńesindegi Qazaqstannyń tóraǵalyǵynyń úsh qyry baryn jetkizdi. «Birinshisi - biz tarıhta birinshi bolyp BUU men BUU Qaýipsizdik Keńesinde atalǵan keńeske múshe jańa elderdiń týlaryn ornatý boıynsha resmı saltanatty shara ótkizdik. Bul dástúrge aınalýy múmkin. Ekinshisi - álem elderine jaǵymdy áser qaldyrǵan Iran boıynsha tótenshe sessııanyń sátti ótkizilýi. Úshinshisi - biz BUU Qaýipsizdik Keńesinde Aýǵanstanǵa mıssııa joldadyq. Kabýlda 20 aýǵan qoǵamdastyqtarynyń ókilderimen men bastaǵan delegasııa 15 kezdesý ótkizdi. Buǵan deıin birneshe memleket bul jumysty iske asyrýǵa tyrysqanymen, ókinishke qaraı múmkin bolmap edi», - deıdi dıplomat. Qaırat Omarov óz sózinde BUU Qaýipsizdik Keńesi tóraǵanyń Aýǵanstan men Ortalyq Azııa tarapynan kómek berý boıynsha málimdemesin qabyldaýy kútilip otyrǵanyn eske saldy.