Bıylǵy jyldyń 9-25 aqpan aralyǵynda Ońtústik Koreıanyń Phenchhan qalasynda ótetin XXIII qysqy Olımpıada oıyndaryna Shyǵys Qazaqstan oblysynan 17 sportshy qatysýǵa úmitker. Jalpy bıylǵy Aq Olımpıadada álemniń 80 elinen jınalǵan bes myńnan astam sportshy 102 medal jıyntyǵyn sarapqa salmaq.
Bul dúbirli dodaǵa Qazaqstannan barlyǵy 62 úmitker, sporttyń toǵyz túrinen, onyń ishinde Shyǵys Qazaqstannan 17 úmitker sporttyń tórt túrinen qatysady dep josparlanyp otyr. Shyǵysqazaqstandyq sańlaqtar negizinen frıstaıl (mogýl), shańǵy jarysy, bıatlon jáne shańǵy tebý sııaqty saıystarda baq synaıdy.
Oblys ákiminiń baspasóz qyzmetiniń taratqan málimetterine súıensek, dúbirli dodada ulttyq qurama sapynda shańǵy jarysynan el quramasynyń kóshbasshysy Alekseı Poltoranın, bıatlonshy Galına Vıshnevskaıa, frıstaıldan Iýlııa Galysheva, Dmıtrıı Reıherd syndy sańlaqtar óner kórsetedi. Sondaı-aq, ulttyq quramanyń eń jas músheleri Aıaýlym Ámirenova men Pavel Kalmakovtyń Aq Olımpıadada júlde alýǵa múmkindikteri bar.
Qazir barlyq sportshylar jarysqa jeke jospar boıynsha daıyndalýda.
Aımaq basshysy Danıal Ahmetovtiń tapsyrmasyna sáıkes oblystyq deneshynyqtyrý jáne sport basqarmasy barlyq sportshylarǵa aılyq eńbekaqy túrinde qoldaý kórsetýde.
«Bizdiń sportshylar XXIII Olımpıada oıyndarynda jaqsy nátıje kórsetedi dep úmittenemiz. Árıne, halyqaralyq jarystarda júlde alǵan jaqsy, biraq elishilik jarystarǵa da jete kóńil bólý kerek. Bizdiń oblysta sportshylarǵa qarjylyq jaǵynan da, klýbtyq daıarlyq jaǵynan da qoldaý jaqsy bola tura qysqy sport túrlerinen elimizde ótken jarystarda ekinshi orynǵa túsip qaldyq. Nege? Osy máseleni jaýapty basqarma baqylaýyna alyp, tıisti qorytyndy shyǵarýy kerek», - dedi Danıal Ahmetov.
Aıta keteıik, elimizde qysqy sport túrleri boıynsha spartakıada 2017 jyldyń qańtar-naýryz aılarynda ótken. Bul jarysta shyǵysqazaqstandyq sportshylar jalpykomandalyq esepte almatylyqtardy alǵa jiberip, ekinshi oryndy ıelengen bolatyn.
Azamat QASYM, «Egemen Qazaqstan»