Tatar ınjenerleri "kóshpeli qonaqúı" oılap tapty, - dep habarlaıdy Qazaqstan telearnasy.
Telearna tilshileriniń málimetinshe, qalaǵa da, dalaǵa da aparyp ornatýǵa bolatyn bul úılerde 1 aıǵa deıin ómir súrýge qajetti dúnıeniń barlyǵy bar eken. ATOMM - ıaǵnı, avtonomdy modýl dep atalatyn bul joba tabıǵat aıasynda demalǵysy keletin týrıster úshin jaıly meken bolǵaly tur.
Qurylysy boıynsha bul týrısterge arnalǵan avtonomdy modýl. Qonaqúıdi kez kelgen jerge aparyp, jarty saǵattyń ishinde ornatýǵa bolady.
Endigide qazandyq ınjenerler oılap tapqan bul jańalyqtyń arqasynda shaǵyn qalalardaǵy qonaqúı tapshylyǵy máselesin sheshýge bolady. Iаǵnı, belgili bir aýqymdy shara ótkizetin shaharda qonaqúı jetispese, osy modýlderdi qaz-qatar qoıyp, qonaqtardy qabyldaı beresiz. Bastysy, bul týrızm salasy úshin taptyrmaıtyn dúnıe. Sebebi, ony túrli demalys oryndary men qurylys salýǵa tyıym salynǵan jerlerge aparyp qoıýǵa bolady.
Jobanyń jetekshisi Anvar Kamalov bul modýldiń tolyqtaı avtonomdy rejimde jumys isteı alatynyn aıtady. "Aıdalaǵa aparyp qoısańyz da, ol ózin-ózi sý, jaryq jáne jylýmen qamtamasyz etedi. Máselen, elektr energııasy Kún batareıalary arqyly óndiriledi. Al turmysqa qajetti sý aldyn ala quıylady. Onyń kólemi bir aıǵa deıin jetedi", - deıdi Kamalov.
"Bul joba óte qyzyq eken. Máselen, sheteldik týrıster tabıǵat aıasynda demalǵysy keledi. Alaıda, ol jerlerde eshbir ınfraqurylym bolmaıdy. Ony salý úshin qyrýar qarjy kerek. Al, mundaı modýlderdiń birnesheýin ózenniń, kóldiń jaǵasyna qoıa salsa, anaǵurlym arzan bolar edi", - deıdi óz kezeginde konvensh bıýronyń dırektory Ivan Kadoshnıkov.
2-3 adamǵa arnalǵan bul qonaqúıdiń kólemi nebári 19 sharshy metr. Esesine, ınjenerler ony barynsha tıimdi paıdalanýǵa tyrysqan. Osylaısha, mundaǵy shaǵyn-shaǵyn 3 bólmeniń zamanaýı qonaq úıden esh aıyrmasy joq.