Birikken Arab Ámirlikteriniń astanasy Ábý-Dabıde ótken djıý-djıtsýdan Grand Slam World Tour halyqaralyq týrnırinde baq synaǵan otandastarymyz oljaly oraldy.
El namysyn qorǵaǵan 17 sportshynyń on ekisi «Qazaqstan Top Tım» klýbynyń ókilderi. Djıý-djıtsý jáne grepplıngten el federasııasynyń atqarýshy dırektory Mıgel Mamyrbaevtyń aıtýynsha, bul týrnır aýqymdy ári bedeldi sporttyq sharalardyń biri sanalady.
Sportshylarymyz el qorjynyna 3 altyn, 4 kúmis jáne 2 qola medal salyp, jarys qorytyndysy boıynsha joǵary nátıjeden kóringen. Aıdar Túleıbaev, Iаdgar Qasymov, Mıgel Mamyrbaevtar jeńis tuǵyrynan kórinip, chempıon atansa, Arlan Shabdarbaev, Erjan Estanov, Muhamedııar Qudaıqulov jáne Osmanjan Qasymov kúmis medaldy enshiledi. Al Tólegen Qumarov pen Batyr Muratuly qolany qanaǵat tutyp, jarys júldegeri atandy.
– Týrnırde júldeli orynnan kóriný úshin bar kúsh-jigerimizdi saldyq. Degenmen tóreshiler tarapynan bolǵan ádiletsizdikterdi de aıtpaı ketýge bolmas. Bizdiń komanda kil myqtylardan quralǵan. Sondyqtan olardyń ádiletsizdigi jarys qojaıyndary men bizdiń sportshylardyń beldesýi kezinde baıqaldy. Jalpy, kórsetken nátıjemiz jaman emes, – deıdi týrnırdiń kúmis júldegeri Osmanjan Qasymov. Grand Slam halyqaralyq týrnıriniń kelesi kezeńi 10-11 naýryzda Londonda ótedi.
Arman OKTIаBR, «Egemen Qazaqstan»
ALMATY