Búgin Almatyda Qazaqstan Respýblıkasy Premer-Mınıstri Baqytjan Saǵyntaev «Jahandaný dáýirindegi sıfrlyq kún tártibi» EAEO halyqaralyq forýmyna jáne Eýrazııalyq úkimetaralyq keńes otyrysyna qatysady. Bul týraly primeminister.kz habarlady.
Búgin 2 aqpanda Almatyda Memleket basshysy Nursultan Nazarbaevtyń bastamasymen «Jahandaný dáýirindegi sıfrlyq kún tártibi» forýmy ótedi, onyń aıasynda ınnovasııalardy jáne tehnologııalyq kásipkerlikti damytý, bazalyq ıntegrasııalyq jobalar, Eýrazııalyq ekonomıkalyq odaqtaǵy ónerkásiptik sıfrlandyrý jáne aýyl sharýashylyǵyn sıfrlyq transformasııalaýdyń ózekti máseleleri talqylanady.
Forým jumysyna Armenııanyń Premer-Mınıstri - K. Karapetıan, Belarýstiń Premer-Mınıstri - A. Kobıakov, Qazaqstannyń Premer-Mınıstri - B. Saǵyntaev, Qyrǵyzstannyń Premer-Mınıstri - S. Isakov, Reseıdiń Premer-Mınıstri - D. Medvedev, sondaı-aq Ázirbaıjan men Tájikstannyń resmı delegasııalary qatysady.
Eske salsaq, 2017 jylǵy qazanda Joǵarǵy Eýrazııalyq ekonomıkalyq keńes otyrysynda EAEO múshe memleketterdiń basshylary 2025 jylǵa deıingi sıfrlyq kún tártibiniń negizgi baǵyttaryn bekitti, sondaı-aq Prezıdent Nursultan Nazarbaevtyń EAEO ekonomıkasyn sıfrlandyrý boıynsha arnaıy kezdesý ótkizý týraly bastamasyn qoldady.
Forýmnyń onlaın-taratylymyn 2 aqpanda 11:00-de PrimeMinister.kz saıtynan jáne Feısbýk, «VKontakte», Tvıtter, Perıskop jáne Odnoklassnıkı áleýmettik jelilerinen, Iýtýb resmı arnasynan, sondaı-aq Androıd pen Aıfonǵa arnalǵan mobıldi qosymshalardan kórińizder.
Kúnniń ekinshi jartysynda Baqytjan Saǵyntaev Eýrazııalyq úkimetaralyq keńestiń shaǵyn jáne keńeıtilgen quramdaǵy otyrysyna qatysady.
Is-sharaǵa Armenııa Respýblıkasynyń Premer-Mınıstri - K. Karapetıan, Belarýs Respýblıkasynyń Premer-Mınıstri - A. Kobıakov, Qyrǵyz Respýblıkasynyń Premer-Mınıstri - S. Isakov, Reseı Federasııasynyń Premer-Mınıstri - D. Medvedev jáne Eýrazııalyq ekonomıkalyq komıssııannyń Alqa Tóraǵasy T. Sarkısıan qatysady dep boljanyp otyr.
Shaǵyn quramda sıfrlyq kún tártibi máselelerin, sondaı-aq ishki naryqtyń jumys jasaýy sheńberindegi qatysýshy elderdiń mindettemelerin qaraý josparlanǵan.
Keńeıtilgen quramdaǵy otyrysta qatysýshylar makroekonomıkalyq jaǵdaıdy jáne EAEO múshe memleketterdiń arasyndaǵy ózara saýda jaǵdaıyn talqylaıdy, agroónerkásip kesheni, ónerkásip kesheni damýynyń ortaq boljamdaryn jáne EAEO múshe memleketterdiń eńbekshilerin zeınetaqymen qamsyzdandyrý máselelerin talqylaıdy.
Otyrys qorytyndysy boıynsha birqatar qujattardy qabyldaý josparlanǵan.