Búgin Úrjar aýdanynyń Besterek aýylynda Astana qalasynyń 20 jyldyǵyna oraı eresekter arasyndaǵy búrkitshilerdiń HII respýblıkalyq chempıonaty bastaldy.
Ulttyq sport túrleri qaýymdastyǵy men Úrjar aýdany ákimdiginiń qoldaýymen, búrkitshi, atbegi Táttimbet Kápulynyń uıymdastyrýymen ótip jatqan qyrandar saıysyna qatysýǵa elimizdiń oblystary men qalalarynan 39 búrkitshi keldi.
«Búrkitshiler saıysy bizdiń aýdanymyzda ekinshi jyl qatarynan uıymdastyrylyp otyr. Osy rette ulttyq qundylyqtarymyzdy ulyqtap, tól sportymyzdy dáriptep júrgen, osy saıystyń ótýine uıytqy bolǵan Táttimbet Kápulyna alǵys bildiremiz. Chempıonattyń sátti ótýine tilektespin», - dedi Úrjar aýdanynyń ákimi Serik Zaınýldın jarystyń ashylý saltanatynda sóılegen sózinde. Sonymen qatar aýdan basshysy T.Kápulyna aýdannyń Qurmetti azamaty ataǵyn berý jóninde usynys túskenin aıtty.
Saltanatty sharada sóz alǵan Ulttyq sport túrleri qaýymdastyǵynyń birinshi vıse-prezıdenti Erlen Ospanov kelesi jyly Úrjar aýdanynda halyqaralyq búrkitshiler saıysyn ótkizýdi josparlap otyrǵandaryn jetkizdi.
Azamat QASYM, «Egemen Qazaqstan» Shyǵys Qazaqstan oblysy, Úrjar aýdany, Besterek aýyly
Sýretterdi túsirgen avtor