Keshe Oqýshylar saraıynda Astana qalalyq bilim basqarmasy «Ashyq esik kúni» formatymen azamattarmen qoǵamdyq qabyldaý ótkizdi. Ashyq kúnniń qorytyndysy boıynsha, eń ózekti másele bolyp mektepke deıingi mekemege kezek pen joldama alý ekeni anyqtaldy. О́ıtkeni, 70%-dan asa azamat joldama boıynsha júgingen, dep habarlaıdy Astana ákimdiginiń Bilim basqarmasy.
Is-shara barysynda 80 aryz-shaǵymǵa jaýap berildi. Odan bólek, ózderi kele almaǵan turǵyndardyń elektrondy túrde joldaǵan joldamalaryna da qyzmet kórsetildi.
«Is-sharany josparlaý kezinde biz qoǵam men basqarma arasyndaǵy «ashyq dıalog alańyn» qurýdy basshylyqqa aldyq. О́zekti máselelerdi talqylaı otyryp, qalalyqtardyń pikirin bilip, jumystyń qalaı uıymdastyrylǵanyn, búgingi usynystardyń negizinde soǵan sáıkes bolashaqta atqarylatyn isterdiń tujyrymyn jasaý. Mundaı sharany jylyna birneshe ret ótkizýdi josparlap otyrmyz», dedi Astana qalalyq bilim basqarmasynyń basshysy Ánýar Janǵozın.
Basqarmanyń málimetinshe, qoǵamdyq qabyldaý kezinde balabaqshaǵa joldama alý men kezek máselesi turǵyndardy kóbirek tolǵandyrǵan. Sondaı-aq ata-analar mektep pen kolledjge túsý, tamaqtaný máselesi, bilim mekemelerindegi áleýmettik kómek pen balalardyń fakýltatıvtik jáne úıirme sabaqtarymen aınalysý máselesi de qyzyqtyrǵan.