Semeı qalasyndaǵy qurylys kolledjiniń №1 jataqhanasynda elektr jelileriniń qysqa tuıyqtalýynyń aqyry órtke ulasqan. Semeı qalalyq tótenshe jaǵdaılar basqarmasynyń baspasóz qyzmeti habarlaǵandaı, qaladaǵy №2 qutqarý toby oqıǵa bolǵan jerge der kezinde jetken.
Jataqhana kezekshisiniń aıtýynsha, qutqarý toby, órt sóndirýshiler kelgenshe qurylys kolledjiniń 4-kýrs stýdenti Jasulan Berekeev balalardy órtten qutqaryp úlgeripti. Qalyń tútin basqan dálizde kishkentaı sábıdiń jylaǵan daýysyn estigen Jasulan birden bólmege kirip ketedi. Sóıtip, qutqarylǵan balany eresekterge tabystaıdy. Besinshi qabatqa qaıta kóterilip, №36 bólmede qalyp qoıǵan eki balany kúrtesimen qymtap dalaǵa alyp shyǵady.
– Kishkentaı balalardy oılaǵan kezde qorqynyshtyń ne ekendigin múlde umytyp kettim, – deıdi Jasulan Talantuly. – tez arada qımyldamasam, balalardan aırylyp qalatynymyzdy uqtym. Qaýip pen qater maǵan tez sheshim qabyldap, qımyldaýyma ǵana múmkindik baryn uqtyrdy.
Jasulannyń arqasynda jeti jasar eki qyz bala men 4 jastaǵy ul bala aman-esen qaldy. Kolledj ujymy men Semeı qalalyq Tótenshe jaǵdaılar basqarmasy stýdenttiń beıbit kúndegi erligin baǵalap, ony marapattaýdy oılastyrýdamyz dep otyr, dep habarlaıdy baspasóz qyzmeti.
Raýshan NUǴMANBEK,
jýrnalıst
Semeı