Májiliste Áleýmettik-mádenı damý komıtetiniń jáne «Nur Otan» partııasy fraksııasy janyndaǵy Áleýmettik keńestiń birlesken otyrysy ótti. Jıynda Elbasy Nursultan Nazarbaevtyń Joldaýyn iske asyrý boıynsha muǵalim mamandyǵynyń bedelin arttyrý máselesi talqylandy.
Komıtet hatshysy Beıbit Mamraevtyń tóraǵalyǵymen ótken otyrys jumysyna Májilis depýtattary, Bilim jáne ǵylym mınıstrligi, Aqparat jáne kommýnıkasııalar mınıstrligi, Bilim qyzmetkerleri kásipodaǵynyń, ata-analar komıtetiniń ókilderi, oqý oryndarynyń basshylary men oqytýshylary qatysty.
Is-sharada muǵalim mamandyǵynyń bedelin arttyrý týraly Bilim jáne ǵylym vıse-mınıstri Ashat Aımaǵambetov jáne Májilis depýtaty Natalıa Jumadildaeva baıandama jasady.
Minberge alǵash bolyp kóterilgen vıse-mınıstr A.Aımaǵambetov bilim salasynda atqarylyp jatqan oń ózgeristerge toqtaldy. Onyń aıtýynsha, Elbasy Joldaýyn júzege asyrý boıynsha ustazdarǵa eńbekaqy tóleýdiń jańa júıesi engizilgen. Soǵan sáıkes, bilim berýdiń jańartylǵan mazmuny úshin 30 paıyz, biliktilik sanaty úshin 30-50 paıyz aralyǵyndaǵy laýazymdyq jalaqy qosý qarastyrylǵan.
Vıse-mınıstrdiń sózine súıensek, bilimge qyzyǵýshylardyń sany artyp keledi. Máselen, 2017-2018 jyldarda osy salaǵa 8129 grant bólingen. Jyl saıyn ustazdardyń sany on myńǵa jýyq jas mamanmen tolyǵady eken. Sondaı-aq muǵalimderdiń deńgeıi de ósken. Joǵary bilimi bar ustazdardyń sany 1991 jyly 66 paıyz bolsa, byltyr bul kórsetkish 90,5 paıyzǵa jetken.
«Kadrlyq áleýettiń sapasyn arttyrý jáne aýyldyq jerlerdegi mamandardy áleýmettik sala men agroónerkásiptik keshenderge jiberý maqsatynda «Dıplommen aýylǵa» jobasy júzege asyrylyp jatyr. Ustazdardyń bedelin nyǵaıtý úshin ola jóninde buqaralyq aqparat quraldarynda maqalalar jarııalanyp, «Úzdik muǵalim» baıqaýy uıymdastyrylyp, túrli jıyndar ótkiziledi», dedi A.Aımaǵambetov.
Budan keıin baıandama jasaǵan N.Jumadildaeva da qazirgi tańda muǵalimderdiń bedeli tómendep ketkenin sóz etti. Onyń aıtýynsha, buǵan eńbekaqynyń tómendigi, qurmettiń azdyǵy sebep bolyp otyr.
«Qazaqstanda pedagogtardyń eńbekaqysy eldegi ortasha jalaqy mólsherinen eki esedeı az. Máselen, muǵalimniń ortasha jalaqysy 99,0 myń teńge bolsa, memleket boıynsha bul kórsetkish 140 265 teńge. Eńbekaqynyń azdyǵy talantty ári qabiletti jastardy bilim salasyna tartýǵa múmkindik bermeı otyr. Elimizde «Altyn belgi» ıegerleriniń 5-7 paıyzy ǵana osy salany tańdaıdy eken», dedi N.Jumadildaeva.
Pikirtalas barysynda muǵalim mártebesi, eńbekti qorǵaý týraly jáne muǵalimderdiń kásiptik qyzmetterin atqarýmen baılanysty emes qosymsha jaýapkershilikterin tómendetý máseleleri sóz boldy. Sonymen qatar pedagog qatysýshylar kadrlardy daıarlaý, mektep pen ata-analar arasyndaǵy yntymaqtastyq jóninde sóz sóılep, kókeıdegi saýaldaryn qoıdy. Jıyn sońynda halyq qalaýlylary muǵalim mamandyǵynyń bedelin nyǵaıtýdaǵy ózekti máselelerdi jan-jaqty talqylap, birqatar usynystar qabyldady.
Abaı ASANKELDIULY, «Egemen Qazaqstan»