Astana qalasynda «Nur Otan» partııasy janyndaǵy «Mıras» respýblıkalyq keńesiniń otyrysy ótti. Jıyn barysynda «Nur Otan» partııasy Tóraǵasynyń birinshi orynbasary Máýlen Áshimbaevtyń qaýlysymen «Mıras» respýblıkalyq keńesiniń tóraǵasy bolyp Parlament Májilisiniń depýtaty Bekbolat Tileýhan bekitilgeni habarlandy.
Beınekonferensııa formatynda ótken otyrysty Bekbolat Tileýxan júrgizdi. Oǵan elimizge keńinen tanylǵan qoǵam qaıratkerleri, Parlament depýtattary, Aqparat jáne kommýnıkasııalar mınıstri Dáýren Abaev, «Egemen Qazaqstan» basylymynyń tóraǵasy Darxan Qydyráli, «Qazaqstan» RTRK basshysy Erlan Qarın, sondaı-aq ózge de tanymal tulǵalar qatysty. Al beıne baılanys arqyly «Nur Otan» partııasy fılıalynyń ókilderi men eriktiler qatysty.
Keńes músheleri kezdesý barysynda «Ulttyq kodty qalyptastyrýdaǵy memlekettik telearnalardyń róli jáne basylymdar, tele, kıno ónimderi, kórsetiletin baǵdarlamalardyń sapasy zaman talabyna, básekelikke sáıkestigi» týraly mańyzdy taqyrypty talqyǵa saldy.
Alqaly jıynda alǵysózdi alǵan Dáýren Abaev Memleket basshysynyń tapsyrmasy boıynsha halqymyzdyń salt-dástúrin, tarıxy men ulttyq qundylyqtaryn nasıxattaıtyn teleónimderge basa mán berilip otyrǵanyn jetkizdi. Sonyń negizinde ótken jyly «Jańǵyrý joly. Jańa turpat» derekti fılmi túsirilgenin, 131 áleýmettik beınerolık daıyndalǵanyn atap ótti.
– Memlekettik telearnalar óz qarajatynan 13 televızııalyq joba men tok-shoý, 3 serıal jáne 5 derekti fılm túsirdi. Budan bólek, sheteldik kórermender úshin «Kazakh tv» arnasy xabar taratyp jatyr. Al memlekettik aqparattyq tapsyrys aıasynda bes memlekettik emes telearna men radıo jumyldyryldy. Onyń nátıjesinde Elbasynyń «Rýxanı jańǵyrý» maqalasyna arnalǵan eki derekti fılm, tórt baǵdarlama daıyndaldy, – dedi Aqparat jáne kommýnıkasııalar mınıstri.
Budan bólek Dáýren Abaev Memleket basshysy telearnalardaǵy serıal ónimderin, onyń sapasyn arttyrý isin tapsyrǵanyn erekshe atap ótti. Sondaı-aq «Habar 24», «Qazaqstan», «Habar», «Astana», «KTK», «Atameken Business Channel», «Tengrı FM» arnalarynyń jumyldyrylýymen atqarylyp jatqan jumystar jaıly aıtýdy da umytpady. Sonymen qatar Qazaqstan xalqy Assambleıasymen birigip «Qazaqstannyń 100 jańa esimi» jobasy ázirlenip jatqanyn, osynyń negizinde joba qatysýshylaryna arnalǵan derekti fılm daıyndalǵanyn da tilge tıek etti.
Basqosýda sóz alǵan «Qazaqstan» RTRK basshysy Erlan Qarın telearnadaǵy otandyq ónimderdiń úlesi qazir 80 paıyzǵa jetkenin erekshe atap ótti. Buryn bul kórsetkish tek 50 paıyzdy quraǵan eken. Sonymen qatar ol jaqyn arada «Altyn qorda» saqtaýly turǵan, ıaǵnı jurttyń ystyq yqylasyna bólengen úzdik baǵdarlamalar kórermen nazaryna usynylatynyn aıtty. Olardyń qatarynda «Ult pen sana», «Paryz ben qaryz» baǵdarlamalary bar.
Jıyn sońynda qatysýshylar, óńirlerden beınekonferensııa arqyly baılanysqa shyqqan eriktiler óz oılaryn bildirip, usynystaryn aıtty. О́z kezeginde telejúrgizýshi Aınur Tursynbaeva birer aı buryn kópshiliktiń kóńilinen shyqqan «Dvıjenıe vverh» fılmi sekildi týyndylar túsirilýi kerektigin alǵa tartty. О́z usynysynda ol Bekzat Sattarhan, Qaırat Rysqulbek sekildi eldiń maqtanyshyna aınalǵan tulǵalar jaıly fılmder qajet ekenin aıtty.
Aıan ÁBDÝÁLI, «Egemen Qazaqstan»