Qyrǵyzstan astanasy Bishkek qalasynda ótip jatqan kúres túrlerinen Azııa chempıonatynda jerlesterimiz tabysty óner kórsetýde. Qurlyqtyq jarysta grek-rım kúresinen balýandarymyz 2 altyn,1 kúmis jáne 4 qola medal ıelendi.
67 kıloǵa deıingi salmaqta beldesken Almat Kebispaev fınaldyq aıqasta japondyq Sýshıký Shımoıamadýǵa qarsy eki nátıjeli ádis jasap, jeńiske jetti. Bul Kebispaevtyń Azııa chempıonattarynan alǵan ekinshi altyn medali. 2011 jyly Azııanyń úzdigi atanǵan ol, 2009, 2017 jyldary fınalǵa deıin jetken bolatyn.
Al Ashat Dilmuhamedov (82 kg) fınalda jergilikti balýan Atabek Ázızbekovpen beldesip, enshilegen tórt upaımen qurlyq jeńimpazy atandy. Ol buǵan deıin 2011 jáne 2016 jyldary ótken Azııa chempıonattarynyń qola júldegeri bolǵan edi.
72 kıloda beldesken jerlesimiz Demeý Jadyraev kilem ıesi Aqjol Mahmýdovqa ese jiberip, kúmis medaldi enshiledi.
Sondaı-aq, Qorlan Jahansha (55 kg), Meırambek Aınaǵulov (63 kg), Maqsat Erejepov (75 kg) jáne Erlan Ysqaqov (97 kg) chempıonattyń qola júldesin qanaǵat tutty.
Álı BITО́RE,
«Egemen Qazaqstan»