Túrki akademııasy halyqaralyq uıymy (TWESCO) Qazaqstan Prezıdenti Nursultan Nazarbaevtyń «Rýhanı jańǵyrý» baǵdarlamasy aıasynda álemdik órkenıetke úles qosqan 100 túrki tulǵasynyń tizimin jasamaq.
Akademııa basshysy Darhan Qydyráliniń aıtýynsha, «Túrki áleminiń 100 tuǵyrly tulǵasy» dep atalatyn aýqymdy joba adamzat tarıhynda iz qaldyrǵan esimderdi anyqtaýdy kózdeıdi. Ol úshin Akademııa arnaıy saıt jasap, halyqaralyq saýalnama júrgizýdi josparlap otyr. Saýalnama nátıjesinde shyn mánisinde ǵylymı, oı-tanym turǵysynan iz qaldyrǵan tulǵalarymyzdy túgendeýge úmittimiz, deıdi uıymdastyrýshylar.
Aıta ketý kerek, búgin Astanadaǵy Ortalyq kommýnıkasııalar qyzmetinde Akademııanyń ótken jyldary atqarǵan qyzmeti men keleshek josparlaryna arnalǵan baspasóz brıfıngi ótti. Jıynda TWESCO basshysy Darhan Qydyráli men Túrki keńesi Aqsaqaldar keńesiniń múshesi Ádil Ahmetov uıymnyń jobalary men halyqaralyq baılanystary jóninde keńeıtilgen málimet berip, jýrnalıster saýaldaryna jaýap berdi.
Sýretti túsirgen Orynbaı Balmurat