Semeıdegi Abaı atyndaǵy qazaq mýzykalyq drama teatrynda «Ahmettiń amanaty» dramasy sahnalandy. Qoıylymda ult ustazy, alash qaıratkeri Ahmet Baıtursynovtyń shyrǵalańǵa toly ómiri, abaqtydaǵy keshken azaby, shekken mehnaty jan-jaqty beınelenedi.
Spektakl áıgili tulǵanyń jary Bádrısafa ekeýiniń shańyraq kóterip, kıiz úıdiń ýyqtaryn qadap jatqan shýaqty sátinen bastalady. Osy ýaqytta «úshtiktiń» jalańdaǵan jendetteri kelip, áıeli men qyzyn jylatyp-syqtatyp Ahańdy tutqyndap áketedi. Qoıylym rejısseri osy bir kúızeliske toly sátti usyný arqyly Baıtursynovtyń ǵana emes, Alashorda úkimetiniń de shańyraǵy shaıqalyp, ult serkeleriniń saǵy syna bastaǵan kezin kórsetkisi kelgen sekildi.
Dramadaǵy oqıǵa jelisi negizinen bas keıipker A.Baıtursynov pen tergeýshi, A.Baıtursynov pen alashtyń jas jolbarysy (spektaklde aty atalmaıdy, biz Muhtar Áýezov pen Álimhan Ermekovtiń biri dep boljadyq-A.Q) arasyndaǵy dıalog retinde órbıdi. «Baıtursynov, moıyndaısyń ba? Qolyńdy qoı da, azaptan qutyl. Erteńge deıin oılan. Taǵy azap kútip tur seni» deıdi zildengen tergeýshi. «Men halqyma eshqashan qarsy bolǵan emespin. Ne azap kórsem de alashshyl qaıratkerlerimdi satpaımyn. Ultymdy satpaımyn. Sony bil» deıdi Baıtursynov. «Degenmen qaısar bul alashtyqtar, syndyram áli, seni, syndyram, saǵyńdy. Netken qaısar adam edi, biraq aıamaý kerek, bul alashtardy» dep kijinedi moıyndata almaı amaly taýsylǵan tergeýshi.
Ult ustazy men áýelde túrmege qamalyp, keıin Baıtursynovtyń keńesimen keshirim surap, aman qalǵan jas jigittiń abaqtydaǵy áńgimesi de áserli shyqqan. «Ár býyn óz dáýirinde ózine artylǵan júkti kóterýi tıis. Biz, alashtyqtar ózimizge artylǵan júkti kóterdik. Baǵasyn keler urpaq beredi. Sen bolashaqsyń, balam, myna qapastan tiri shyǵýyń kerek, sonda ǵana aqıqatty aıta alasyń. Biz armandaǵan asyl kúndi sender keler urpaq kóresińder. Túbi azat el bolady, Alash! Men oǵan senem» deıdi óz ómiriniń sońyna jetkenin bilse de, keleshektiń jaryǵynan úmit úzbegen Ahań. «Aha, men eger tiri jetsem bolashaqqa, men muny óz aýzymnan aıtyp berem. Keler urpaq, jas býyn, jańa zaman sizderdi aqtap alady dep senemin» deıdi bolashaqtan kúder úzbegen jas jigit. Qoıylymda Álıhan Bókeıhanov pen Mirjaqyp Dýlatovtyń Ahmet Baıtursynovtyń shańyraǵynda bolyp, bolashaq Alashorda úkimetiniń baǵyt-baǵdaryn talqylaǵan sátteri de sahnalyq sheginis jasaý arqyly aıshyqty bederlengen.
Dramanyń avtory – óskemendik aqyn Áskerhan Aqtaı. Rejısseri – Erbol Jýasbek. Áskerhan Aqtaı bul týyndysyn negizinde byltyr Alashordanyń 100 jyldyǵyna oraı jarııalanǵan shyǵarmashylyq baıqaýǵa arnap jazǵanyn, alaıda baıqaý qorytyndysy shyqpaǵannan keıin oblystyq Mádenıet basqarmasyna usynǵanyn aıtady. «Basqarma usynysymdy qýana qabyldap, «Semeıde qoısaq qaıtedi» dedi. Semeı teatry da bul iske irkilmeı kirisip, qoıylymdy sahnalady. Usynysymdy qoldap, qýattaǵan oblystyq mádenıet basqarmasy, Semeıdegi teatr dırektory Baýyrjan Tólekov, rejısser Erbol Jýasbek pen ondaǵy akterlerdiń jumyla kótergen júginiń arqasynda spektakl sátti shyqqan sekildi. Baǵasyn halyq bere jatar. Alashtyń, alash qaıratkerleriniń rýhyna arnalǵan dúnıe ǵoı bul», - deıdi drama avtory.
Bas keıipker Ahmet Baıtursynovty keıiptegen akter Bekzat Omashev: «Ońaı ról joq qoı. Árbir róldiń óz jaýapkershiligi, óz qıyndyǵy bar. Al sanaly ǵumyryn ult múddesine arnaǵan ózi ǵalym, ózi qaıratker Ahmet Baıtursynovtaı kesek tulǵanyń rólin somdaý eki ese jaýapkershilik júktegeni ras. О́z rólimde alash qaıratkeriniń zııaly, bekzat bolmysyn kórsetýge tyrystym. Alash, Alashorda týraly eńbekterdi paraqtap shyqtym. Munyń aldynda Mustafa Shoqaı rólin oınap, Atyraýda ótken festıvalge qatysyp, teatrymyz laýreat atanǵan-dy. Bul - repertýarymdaǵy kósemderdiń ekinshi róli. Mundaı salmaqty rólder akterdi ósiredi, shyǵarmashylyǵyn odan ári shyńdaı túsedi dep oılaımyn» dedi. Al Ahmet Baıtursynovtyń jary Bádrısafanyń rólin somdaǵan Sulýshash Tólekova da qoıylym ózine úlken jaýapkershilik júktegenin, «drama qalaı shyǵar eken?!» dep tolqyp, qobaljý sezimin bastan ótkergenin jasyrmady.
«Alash taqyryby qazaqtyń janyna jaqyn bolǵanymen ult ustazy atanǵan Ahmet Baıtursynovtyń jarynyń rólin alǵanda tolqyǵanym ras. Rólimdi durys oınaı almaı Alash tarıhyna jetik adamdar tarapynan syn estip qalmaımyn ba degen de ýaıym boldy. Alaıda Allaǵa shúkir, qoıylym jaman sahnalanbaǵan sekildi. Jurtshylyq jyly pikirlerin bildirip jatyr. Bádrısafa apamyzdyń rólin somdaý barysynda alash qaıratkerleri ǵumyr keshken qıly zamandy kóz aldymnan ótkergendeı boldym. Alash qaıratkerleriniń mamyrajaı, alańsyz shaqtary kóńilińe qýanysh syılap, eńseńdi kóterse, túrmege qamalyp, azap shekken mezetteri kózińe jas úıirip, júregińdi aýyrtady. Bul qoıylymnyń jas urpaqqa berer taǵylymy mol. Sondyqtan jastar kóbirek kelip kórse deımiz», - deıdi aktrısa.
Azamat QASYM,
«Egemen Qazaqstan»
SEMEI