Eńbek jáne halyqty áleýmettik qoldaý vıse-mınıstri Nurjan Áltaev Qarabatan stansııasyndaǵy vahtalyq qalashyqtaǵy órt kezinde zardap shekken eki adamnyń jaǵdaıyn bildi, dep habarlaıdy Atyraý oblystyq baspasóz qyzmeti.
Atap óteıik, Nurjan Áltaev Atyraýdaǵy 7 adam qaza tapqan vahtalyq qalashyqtaǵy órt jaǵdaıy saldaryn anyqtaıtyn úkimettik komıssııany basqardy. 3 naýryz, senbi kúni, Atyraý oblysynyń Qarabatan stansııasynda gaz týrbınalyq elektr stansııasynyń qurylys alańynda bolǵan tótenshe jaǵdaıdyń mán-jaıyn anyqtaý úshin komıssııa keldi.
Komıssııa quramyna ishki ister mınıstrligi, densaýlyq saqtaý mınıstrligi, tótenshe jaǵdaılar komıteti men Atyraý oblystyq ákimdik ókilderi kirdi. Qarabatan stansııasynda oryn alǵan oqıǵany tekserýden keıin eńbek jáne áleýmettik qorǵaý vıse-mınıstri Atyraý oblystyq aýrýhanasynyń hırýrgııalyq bóliminde em alyp jatqan eki zardap shegýshige bardy. Búginde olardyń jaǵdaıy turaqty, jumysshylar oqıǵa ornynan tómen jaǵdaıdaǵy kúıikpen aýrýhanaǵa jetkizilip, tıisti em qabyldaýda.
Eńbek jáne áleýmettik qorǵaý vıse-mınıstriniń aıtýynsha, tótenshe jaǵdaı oryn alǵan jerde bolǵan kompanııanyń barlyq qyzmetkerleri saqtandyrylǵan, sondyqtan tergeý aıaqtalǵannan keıin zardap shekken qyzmetkerler men qaza bolǵan qyzmetkerlerdiń týystary qarjylyq kómek alady.
- Zańnamada belgilengen rásimder bar, kimniń kinási - jumys berýshilerdiń nemese jumysshylardyń ózderiniń kinási bolǵanyn anyqtaý úshin barlyq rásimderdi júrgizýimiz kerek. Biz qazir barlyq saqtandyrý kelisimsharttaryn kóterip, qyzmetkerlerge qandaı ótemaqy tólenetinin qarastyramyz. Budan basqa, tótenshe jaǵdaı oryn alǵan nysandy teksergennen keıin, barlyq jataqhanalar jumysyn toqtata turý týraly sheshim qabyldandy», - dedi Nurjan Altaev.
Sondaı-aq, vıse-mınıstrdiń aıtýynsha, qazirgi ýaqytta kompanııanyń basqa qyzmetkerleri tergeý aıaqtalǵanǵa deıin úılerine jiberildi. Olar úshin jalaqy saqtalady. Barlyq konteınerlik úlgidegi jataqhanalar qaýipsizdiktiń standarttaryna jáne talaptaryna tolyq sáıkestendirilgennen keıin, jumysshylar qaıta kelip, jumysyn jalǵastyra alady.