Údemeli ındýstrııalyq-ınnovasııalyq damý baǵdarlamasy aıasynda Atyraý oblysynda qolǵa alynǵan jumystar jaıly jarysa jazǵanbyz. Olardyń arasynda Qazaqstanda ǵana emes, TMD-da teńdesi joq ǵajap jobalar boldy.
Alaıda ýaqyt synynan ótý bárine birdeı ońaıǵa túspeı tur. Mysaly, elýden astam dári-dármek túri shyǵarylady degen farmasevtıkalyq zaýytty alaıyq. Mundaı úlken kásiporyn postkeńestik elderde buryn-sońdy bolmaǵan dep, jobaǵa senim artqan edik. Amal ne, orta jolǵa kelgende zaýyt qurylysy toqtap qaldy. Jarǵylyq kapıtaldyń 3 paıyzy «Atyraý» áleýmettik-kásipkerlik korporasııasyna, 97 paıyzy zaýyt ıelerine tıesili bolatyn. «Atyraý» ÁKK óz kezeginde 800 mln teńge qaryz berdi. Bastapqyda jobalaýǵa baılanysty problemalar bolypty, keıin zaýyttyń basqarýshy kompanııasy qarjyny maqsatsyz jumsaǵany anyqtalǵan. Zaýyt shyǵynnyń ornyn toltyrdy degenmen, jumystyń aldaǵy baǵyty dúdámal kúıde. О́ńirlik kommýnıkasııalar qyzmetinde ótken brıfıngte oblys ákiminiń birinshi orynbasary Saǵyndyq Luqpanov osy tektes jaıttardy ashyp aıtty. – Joba bastamashylary barlyq múmkindikti qarastyramyz degenmen, qazir zaýyttyń qarjylyq ahýaly qıyn, – dedi ol.
«PKF Kontınent Ko LTD» JShS «Bıznestiń jol kartasy-2020» memlekettik baǵdarlamasy aıasynda optıkalyq-talshyqty kabel zaýyty jobasyn qolǵa alǵan edi. Mundaı óndiris orny bizdiń elde ekeý ǵana, biri – Qostanaıda, ekinshisi – Atyraýda. Zaýyt jumys istep tur, biraq ónimdi «Qazaqtelekom» AQ qana alady. Basqa asa qajettilik joq. Osyny eskergen jergilikti atqarýshy bılik mys kabel shyǵarýdy usyndy. Bul jerde bir atap óterlik jaıt, kóptegen kompanııa menedjment qaǵıdalaryn qaperge ala bermeıdi. Jap-jaqsy jobalardyń orta jolda turalap qalýyna o basta ónimdi ótkizý, shıkizatpen qamtý, baǵa saıasaty sekildi mańyzdy máselelerdi eskermeý sebep bolyp otyr. Muny oblys ákiminiń birinshi orynbasary da joqqa shyǵarmady.
Básekelesterdiń múmkindikterin eskermeýdiń aqyry jaqsylyqqa ákelmeıdi. Mysaly, «Shevron» kompanııasynyń ilmekti armatýra zaýyty shyǵaratyn ónimderdiń naryqtaǵy quny joǵary. Basqa óndirýshiler budan áldeqaıda arzanǵa usynǵasyn, suranys ta az.
– Biz zaýyt basshylyǵymen birneshe ret kezdesip, bul jaǵdaıdan shyǵýdyń joldaryn qarastyrdyq. Biraq memlekettik tapsyrys aıasynda da zańnan attap kete almaımyz, – deıdi S.Luqpanov.
Memlekettiń qyrýar qarjysyn shyǵyndap qolǵa alynǵan jumystardyń jarty jolda júzege aspaı qalýy, árıne ókinishti. El senim artqan ınnovasııalyq jobalar áli de bolsa ońalyp keter degen úmit basym.
Baqytgúl BABASh,
«Egemen Qazaqstan»
ATYRAÝ