Atyraýlyq burymdy qyzdar baıqaýǵa qatysyp, baq synady. Oblystyq tarıhı-ólketaný mýzeıinde ótken sharaǵa qatysýshylardyń shashtarynyń uzyndyǵy, qalyńdyǵy, kútimi, sándi órimderi men sahna mádenıeti, salt-dástúrdi meńgerýi synǵa tústi.
Uıymdastyrylǵan baıqaýdyń bas júldesin Araılym Smaǵulova jeńip aldy. Kaspıı óńiriniń qazirgi zamanǵy kolledjinde oqıtyn Araılymnyń shashynyń uzyndyǵy 100 sm.
Burymdy qyzdar tanystyrý, shash órý úlgilerin kórsetý, mýzeı qoryndaǵy zergerlik buıymdardy taǵyp, erekshelikterin aıtý, maqal-máteldi jalǵastyrý sekildi baıqaý talaptarynan súrinbedi. Olardyń ónerlerin pedagogıka ǵylymdarynyń kandıdaty, bilim berý salasynyń ardageri Nurzıla Sársenqyzy bastaǵan qazylar alqasy baǵalady.
D.Nurpeıisova atyndaǵy Atyraý mýzyka kolledjiniń stýdentteri Roza Maıranova, Aımeken Qurmetqyzy, Arýjan Artýrqyzy, Kaspıı óńiriniń qazirgi zamanǵy kolledjiniń stýdenti Nursáýle Qadyrjanova, Bıznes jáne quqyq kolledjiniń stýdenti Quralaı Orazǵalıeva, Munaı jáne gaz ýnıversıtetiniń stýdenti Gúlnaz Ǵasyrbekqyzy, Q.Dútbaeva atyndaǵy gýmanıtarlyq kolledj stýdenti Jańylsyn Erǵalıqyzy arnaıy atalymdarmen marapattaldy.
– Qazaq qyzynyń qashanda aqylyna kórki saı bolǵan. Ulttyq salt-dástúrdi tanyp, bilip, kúndelikti ómirde qoldanýdy nasıhattaý osyndaı sharalardan bastalady. Baıqaýǵa qatysqan arý qyzdardyń ıba, uıat, ıman sekildi asyl qasıetterdi boılaryna jınaǵandaryn kórip, rıza boldyq, –deıdi mýzeı dırektorynyń orynbasary Saıa Ǵazımova.
Baqytgúl BABASh,
«Egemen Qazaqstan»
ATYRAÝ