Búgin MJÁ qaǵıdalaryna negizdelgen, JOO-lar men kolledj stýdentterine arnalǵan jataqhanalar qurylysy máselesine arnalǵan QR Úkimetindegi baspasóz konferensııasynda «Qarjy ortalyǵy» AQ prezıdenti Asqar Ibraımov el stýdentterine jańa jataqhanalar salýdan ózge, qazirgi paıdalanylyp jatqan jataqhanalarda jóndeý jumystary júrgiziletinin atap ótti, dep habarlaıdy primeminister.kz.
A. Ibraımovtyń aıtýynsha, stýdentterdiń jataqhanalaryn jaqsartý aıasynda «Qarjy ortalyǵy» AQ fýnksıonaly búgingi tańda birinshi kezekte atalǵan tetiktiń naqtylanýyna negizdeledi: normatıvter, esepteýler, tólemder jasaý, ázirleý, tıptik kelisimshart jasasý.
«Búkil tetik birizdilik, básekege qabilettilik, teńgerimdik jáne tıisinshe nátıjelilik qaǵıdalaryn saqtaı otyryp júrgiziledi», — dedi qarjy ortalyǵynyń basshysy.Ol sondaı-aq, jańa jataqhanalar salýdan basqa, qoldanystaǵy turǵyn nysandarynda josparly jóndeý jumystary júrgiziletinin aıtty.
«Bizdegi qazirgi paıdalanylyp jatqan jataqhanalardyń nelikten osyndaı joǵary-amortızasııalyq jaǵdaıda ekenin aıtar bolsaq, bizde tósek-oryndarynyń tapshylyǵy bar, amortızasııa júrip jatyr. Oryn tapshylyǵy máselesin sheshken kezde, kúsheıip ketken amortızasııa máselesi ózdiginen joıylady. Josparly jóndeý jumystary talaptar men standarttarǵa sáıkes júrgiziletin bolady», — dep qorytyndylady spıker.