Elbasy Nursultan Nazarbaev Ortalyq Azııa elderi basshylarynyń konsýltatıvtik jumys kezdesýiniń qorytyndysy boıynsha buqaralyq aqparat quraldarynyń ókilderi úshin brıfıng ótkizdi, dep habarlaıdy Aqordanyń baspasóz qyzmeti.
Qazaqstan Prezıdenti brıfıng barysynda Ortalyq Azııa elderi kóshbasshylarynyń qatysýymen ótken konsýltatıvtik jumys kezdesýiniń nátıjeleri týraly aıtty.
– Ortalyq Azııa elderi basshylarynyń konsýltatıvtik jumys kezdesýi tolyq ózara túsinistik pen tatý kórshilik jaǵdaıynda ótti. Biz kún tártibindegi halyqaralyq jáne óńirlik ózekti máseleler boıynsha paıymdy da syndarly oı-pikirlerimizdi ortaǵa saldyq, – dedi Memleket basshysy.
Nursultan Nazarbaev Ortalyq Azııanyń barlyq elderi Reseı Federasııasymen belsendi ekonomıkalyq yntymaqtastyq ornatqanyn atap ótti.
– Biz óńirdiń kólik-logıstıka júıesin ekijaqty formatta da, Eýrazııalyq ekonomıkalyq odaq aıasynda da birlese qalyptastyramyz. Sonymen birge, ishki óńirlik problemalarymyzdy biz úshin eshkim sheship bermeıtinin túsinemiz. Osyǵan oraı bazalyq basymdyqtardy anyqtap, keleshektiń josparyn jasadyq, – dedi Qazaqstan Prezıdenti.
Memleket basshysy óńirlik qaýipsizdik pen Aýǵanstandaǵy ahýal máseleleri boıynsha júrgizilgen kelissózderdiń nátıjelerine toqtaldy.
– Ortalyq Azııanyń barlyq eli Aýǵanstandaǵy saıası-ekonomıkalyq damý jáne saıası máselelerdi retteýge qoldaý kórsetý úshin ózderiniń úlesin qosýda. Biz ózara kúsh-jigerimizdi jumyldyra otyryp, Aýǵanstan problemasyn halyqaralyq deńgeıde talqylaýdy jalǵastyrýǵa kelistik. Qazaqstan Birikken Ulttar Uıymy Qaýipsizdik Keńesiniń turaqty emes múshesi retinde bul baǵyttaǵy jumystardy halyqaralyq dárejede belsendi júrgizip keledi, – dedi Nursultan Nazarbaev.
Qazaqstan Prezıdenti bizdiń elimiz óńir elderiniń qaýipsizdik keńesi apparattary arasynda besjaqty turaqty konsýltasııalar júrgizý tetigin jasaýdy usynǵanyn atap ótti.
– Bul kelisilgen ustanymdardy iske asyra otyryp, óńir qaýipsizdiginiń mańyzdy máseleleri boıynsha turaqty dıalog jasap turýǵa múmkindik beredi. Bes el arasyndaǵy shekarany delımıtasııalaý jáne demarkasııalaý jumystaryn aıaqtaý isi negizgi baǵyt bolyp sanalady. Osyǵan baılanysty delegasııa basshylary óńirimizdegi qaýipsizdik pen turaqtylyqty kúsheıtý maqsatymen bul úderisti jyldamdatýdyń qajet ekendigin maquldady, – dedi Memleket basshysy.
Nursultan Nazarbaev Ortalyq Azııa elderi arasyndaǵy saýda-ekonomıkalyq yqpaldastyq máselelerine toqtalyp, óńirdiń qarqyndy damyp kele jatqanyn jáne odan ári ilgerileýge áleýeti tolyq jetetinin aıtty.
– Birikken Ulttar Uıymynyń málimeti boıynsha, sońǵy 10 jylda Ortalyq Azııa elderindegi ishki jalpy ónimniń ortasha ósimi 6,2 paıyzdy qurady. Bul sol kezeńdegi 2,6 paıyzdyq ortasha kórsetkishten asyp túsedi. О́ńir elderiniń syrtqy saýdasynda da ósim bolǵany baıqaldy, – dedi Qazaqstan Prezıdenti.
Memleket basshysy ózara saýda kóleminiń ósýi Ortalyq Azııa elderindegi turǵyndardyń ómir súrý deńgeıiniń artýyna septigin tıgizgenin atap ótti.
Nursultan Nazarbaev jumys kezdesýi barysynda óńirlik ekonomıkanyń ornyqty damýyn qamtamasyz etý úshin sharalar qarastyrylǵanyn aıtty.
– Elderimiz arasyndaǵy ózara saýda jasaý isinde taýarlardyń nomenklatýrasyn keńeıtý qajet. Bizdiń eksport-ımport operasııalarymyzǵa qatysty salystyrmaly statıstıkalyq málimetter bul baǵytta zor múmkindikter bar ekenin dáleldeıdi. Elderimiz arasyndaǵy ınvestısııalyq yntymaqtastyq pen ınvestorlardy birlese qorǵaý isin jaqsartý úshin júıeli jumys júrgizý qajet, – dedi Qazaqstan Prezıdenti.
Budan bólek, Memleket basshysy ekonomıkany jańa ınnovasııalyq-sıfrlyq platformaǵa kóshirý qajettigine toqtalyp, tranzıttik tasymaldaýlar kezinde tarıftik saıasatty ońtaılandyrýdyń jáne ákimshilik rásimderdi jeńildetýdiń mańyzdylyǵyn atap ótti.
Sondaı-aq, Nursultan Nazarbaev transshekaralyq sý resýrstaryn paıdalaný máselelerin ortaq quqyqtyq ustanymdar, ózara qurmet jáne barlyq taraptyń múddelerin saqtaý negizinde sheshýdiń mańyzdy ekenine nazar aýdardy.
Qazaqstan Prezıdenti konsýltatıvtik kezdesý barysynda óńirdegi ekonomıkalyq yntymaqtastyqty ilgeriletý maqsatymen vıse-premerler deńgeıinde besjaqty jumys komıssııasyn qurý týraly usynys qarastyrylǵanyn aıtty.
– Qarqyndy damý úshin ishki óńirlik qarjylandyrý kózderin qalyptastyrý qajet, – dedi Memleket basshysy.
Nursultan Nazarbaev mádenı-gýmanıtarlyq baılanystar óńirlik ózara is-qımyldy kúsheıtýdiń mańyzdy faktory bolyp sanalatynyn aıtty.
– Biz osy baǵyttaǵy yntymaqtastyǵymyzdy odan ári arttyrý jóninde ýaǵdalastyq. Ǵylym jáne bilim berý salasyndaǵy ózara is-qımyldy damytý úshin Qazaqstan óńirdegi elderdiń stýdentterin oqýǵa qabyldaýǵa daıyn. Sport jáne týrızm salasynda ortaq sport sharalaryn ótkizýdi jandandyryp, Ortalyq Azııanyń birikken týrıstik baǵdaryn ázirleýge múmkindigimiz bar, – dedi Qazaqstan Prezıdenti.
Sońynda Memleket basshysy qol jetkizilgen ýaǵdalastyqtar memleketterimizdiń yntymaqtastyǵyna aıtarlyqtaı serpin beretinine senim artty.
– Eń bastysy, bizde ortaq túsinistik qalyptasty, sondaı-aq seriktestigimizdi nyǵaıtýǵa jáne bir-birimizge qoldaý kórsetýge nıettimiz. Sondyqtan biz mundaı kezdesýlerdi jyl saıyn turaqty túrde, barlyǵymyzǵa ortaq uly Naýryz merekesi qarsańynda ótkizý jóninde ýaǵdalastyq, – dedi Nursultan Nazarbaev.