Qazirgi tańda Aqmola oblysynda tótenshe jaǵdaılar qyzmeti kóktemgi sý tasqynynyń aldyn alý jumystaryna kirisip te ketti. Ásirese Atbasar aýdanynda ótken jylǵy jaǵdaıdyń qaıtalanýy múmkindigi de joqqa shyǵarylmaýda.
Osyǵan oraı jaqynda bul aýdanda «Kóktem-2018» respýblıkalyq komandalyq-shtabtyq oqý-jattyǵýynyń ótkizilýi daıyndyq jumystarynyń qanshalyqty uıymdastyrylǵandyǵyn ashyp kórsetip berdi.
Qazaqta «Aýzy kúıgen úrlep ishedi», demekshi byltyrǵy kóktemde sý tasqyny biraz jurtty ábigerge salyp ketkeni áli esimizde. Joldar shaıylyp, maldar sýǵa aǵyp, jergilikti turǵyndardyń baspanalary sýǵa tolǵan edi. Osylaısha kóktemgi qarǵyn sý óńirge aıtarlyqtaı ekonomıkalyq shyǵyn alyp kelgen. mundaı jaǵdaı jańadan qyzmetine belsene kirisken oblys ákimi Málik Myrzalın úshin úlken syn boldy. Jan-jaqtan kelgen qoldaýdyń arqasynda qıyndyqty eńsere bilgen oblys basshysy artynan sol sý alǵan óńirlerge arnaıy baryp, jaǵdaımen jaqyn tanysqan. Naqty tapsyrmalar da bergen. Sodan beri jaǵdaı birshama ońdalyp qalǵan sııaqty. Alaıda ol tapsyrmalar qanshalyqty tyńǵylyqty oryndaldy, ony bıylǵy kóktemgi jaýyn-shashyn dáleldemek.
Atbasar aýdanyna jasalǵan baspasóz týry barysynda oblystyq tótenshe jaǵdaılar departamentiniń bastyǵy Alekseı Sovetov aldyn alý sharalaryna qatysty málimettermen bólisti. Jalpy, Atbasar sý basý qaýpi joǵary aýdandar qatarynda. Olaı deıtinimiz, osyndaǵy Jabaı ózeninde, sol tóńirekte ylǵaldyń mólsheri shamadan tys. Onyń ústine birneshe jylǵa sozylǵan baqylaýlar nátıjesi kórsetkendeı, aýdan aýmaǵyna naýryz jáne sáýir aılarynda jaýyn-shashyn túspeı qoımaıdy. Al bul bógetterge salmaq salyp, apat qaýpin kúsheıte túsetini sózsiz. Osyǵan oraı sý tasýynyń aldyn alý maqsatynda joǵaryda atap ketkendeı qutqarýǵa qurylǵan oqý-jattyǵýdan ózge kóptegen naqty is-sharalar qolǵa alynǵan. Tipti bul maqsatqa aýdandyq bıýdjetten 57,3 mıllıon teńge de bólinipti. Jalpy, Atbasar qalasy tirshiligin qamtamasyz etý nysandarynyń, tótenshe jaǵdaılar qyzmetteriniń jumysyn úılestirý maqsatynda aýdan ákimi apparatynyń ókilderi ishinen jedel shtab jumysy uıymdastyrylǵan. Atbasar aýdanynyń ákimi Amanbek Qaljanov jaqynda arnaıy-taktıkalyq oqý-jattyǵýlardyń sátimen ótkendigimen de bólise ketti. Sóz reti kelgende atalǵan arnaıy-taktıkalyq oqý-jattyǵýǵa barlyǵy 99 adam jáne 18 birlik órt, avarııalyq-qutqarý, ınjenerlik tehnıka tartylsa, tótenshe jaǵdaı oryn ala qalǵan kezde sapqa 270 adam jáne 94 birlik arnaıy tehnıka nemese odan da kóp kúsh jumyldyrylady dep kútilýde.
Budan basqa, ótken jyldardaǵy ketken kemshilikter eskerilip, sý tasqynynyń aldyn alý mashyqtary jan-jaqty eskerilgen. Sondaı-aq bıylǵy kóktemgi sý tasqynynyń aldyn alýda tótenshe jaǵdaılardy boldyrmaý maqsatynda azamattyq qorǵaý quramalary men apattyq-qutqarý qyzmetteriniń birlesken is-qımylyn úılestirý jaǵy da jan-jaqty pysyqtalǵan. Biraq soǵan qaramastan, Atbasar aýdanyndaǵy eldi mekenderdi sý basý qaýpi áli de seıilmeýine baılanysty Novoselskoe, Pokrovka, Poltavka sııaqty aýyldarda sý tasýynyń aldyn alýǵa qatysty túrli sharalar júrgizilgen. munyń barlyǵy da Atbasar aýdanyndaǵy eldimekenderdi ınjenerlik qorǵaýdyń kestesine sáıkes júzege asyrylýda. Al ózge aýyldyq okrýgtarda jumystar aǵymdaǵy jyldyń 15 naýryzyna deıin aıaqtalady dep josparlanǵan.
Asqar TURAPBAIULY, «Egemen Qazaqstan»
Aqmola oblysy