Ońtústik Qazaqstan oblysy Sharadara aýdanynda kóktemgi egis egý naýqany bastaldy, dep habarlaıdy OQO ákimdiginiń baspasóz qyzmeti.
Onyń ishinde jaýshyqumdyq dıqanshy alǵash bolyp ınnovasııalyq ádis boıynsha pııaz egýdi bastap ketti. Atalǵan ádispen pııaz egýdi birneshe jyl buryn qolǵa alǵan «Turar» aýyl sharýashylyǵy óndiristik kooperatıvi 33 gektar alqapqa pııaz tuqymyn seýip shyqty.
Sharýanyń aıtýynsha, bul tehnologııa bir mezette birneshe jumysty atqaryp shyǵady eken. Birinshiden túıir kesek qaldyrmaı úgitilgen topyraqqa 3 sm-den tuqym tastasa, ekinshiden tamshylatyp sýaratyn sý tútigin qosa kómip ketedi. Sapasy joǵary gollandtyq pııazdyń tuqymy birkelki egilgendikten shyǵymy da túgel bolady.
«Bir gektarǵa 5 kelideı tuqym ketedi. Jańa tehnologııany endirýdiń arqasynda shyǵyn kólemi burynǵydan 5 ese azaıyp, esesine ónimdilik arta tústi. О́tken jyly ár gektaryna 100 tonnadan ónim aldyq», dedi «Turar» aýyl sharýashylyǵynyń tóraǵasy Iýrıı An.
Bıyl jalpy shardaralyq dıqandar 59 300 gektar alqapqa egin ekpek. Al aýyl sharýashylyǵy daqyldaryn ártaraptandyrý maqsatynda osy jyly byltyrǵy 2017 jylmen salystyrǵanda jazdyq arpa 1573 gektardan 2000 gektarǵa, kúrish 896 gektardan 1200 gektarǵa, dándik júgeri 2723,7 gektardan 6400 gektarǵa, jańa jońyshqa 4484 gektardan 5000 gektarǵa, baqsha 8815,3 gektardan 11050 gektarǵa, bir jyldyq jáne kóp jyldyq mal azyqtyq daqyldary 22365 gektardan 24358 gektarǵa ulǵaıtý mejelenýde. Kerisinshe maqta daqylyn egý 20460 gektardan 12000 gektarǵa deıin azaıyp otyr.
Sharýashylyqtyń tuqym sebý jumysymen tanysqan aýdan ákimi Bolatbek Qystaýov jańa tehnologııamen egin egý - sharýa shyǵynyn azaıta otyryp, mol ónim alýǵa qol jetkizetinin atap ótti.
«Turar» aýyl sharýashylyǵy óndiristik kooperatıvinde jańa ádispen egin egýdi bastap jatyr. Ozyq tehnologııany paıdalaný degenimiz – sharýa shyǵynyn azaıta otyryp, mol ónim alýǵa qol jetkizý ekeni belgili. Iýra baýyrymyz byltyr joǵary jetistikke qol jetkizgen, bıyl da sol bıikten kórinemiz dep senemiz. Bul sharýashylyq pııazdan bólek taǵy da 33 gektar alqapqa maqta daqylyn, 10 gektar alqapqa baqsha daqyldaryn tamshylatyp sýarý ádisimen egýdi josparlap otyr. Qazirgi tańda memleket tarapynan qoıylyp otyrǵan mindettiń biri – aýyl sharýashylyǵy salasyn ártaraptandyrý. Iаǵnı, aýyspaly egisti saqtaı otyryp, dıqandarymyz tabysy mol daqyl túrlerin egýdi qolǵa alý kerek. Bul baǵytta tıisti jumystar júrgizilip jatyr», dedi aýdan basshysy.
Qazirgi kúni dıqan qaýymy jer jyrtý jumysyn aıaqtap, sor shaıý, ylǵaldandyrý jumystarymen aınalysýda. Al aýdan ákiminiń ókimimen «Aýdanda 2018 jylǵy kóktemgi dala jumystaryna járdemdesý jónindegi» aýdandyq shtab quryldy. Búgingi tańda aýdanda traktorlardyń 941 danasy kóktemgi dala jumystaryna tartylýda.