Táýelsizdik bederinde tolassyz ótip kele jatqan «Qazaqstan arýy» ulttyq baıqaýyna bıyl 21 jyl tolady. Astanadaǵy naýryzdyń sońǵy kúninde elimizdiń eń sulýynyń esimi belgili bolady. Al oǵan deıin 31 naýryz kúni Beıbitshilik jáne kelisim saraıynda márege jetetin baıqaý bıyl kóktemniń shýaqty merekesi – Naýryzǵa baǵyshtalatyndyǵyn baıandaımyz.
Baǵamdap otyrsaq, osy jyldar ishinde elimizdiń ár aımaǵynda baıqaýdyń ókildikteri ashylypty. Oblystyq týrlardyń jeńimpazdary jyl saıyn óz óńirleriniń namysyn Baıqaýdyń Ulttyq fınalynda qorǵap júr.
Bir jaǵynan osynaý sulýlyq dýmanyn urpaqtan urpaqqa jalǵasyp kele jatqan ata-babamyzdyń kóregendigi men danalyǵynan, dástúrin ulyqtaıtyn shara dep qaraý kerek. Azııa men Eýropa mádenıetteriniń toǵysynda turǵan Qazaqstannyń geografııalyq ornalasýy názik jandylarǵa tán sulýlyqtyń biregeı, ózindik, erekshe úlgisin jasaýǵa septigin tıgizdi.
Olımpıada oıyndary sııaqty, arýlar baıqaýy da elimizdiń jastaryn estetıkalyq turǵydan tárbıeleýdi nasıhattaý jáne damytý úshin qatysýshylardy biriktirip, jaqyndastyrady, olardyń boıyndaǵy jaqsy qasıetterin ashady.
Joba memlekettik tildi, ulttyq kásip, mádenı mura, ulttyq kıim, dástúrli taǵam sııaqty etnıkalyq negizderdi saqtaý jáne nasıhattaýǵa talpynady.
Oǵan qosa «Qazaqstan Arýy» baıqaýy Qazaqstan Respýblıkasy aýmaǵynda «Dúnıejúzi Arýy» (AQSh), «Álem Arýy» (Ulybrıtanııa) sııaqty iri álemdik baıqaýlardyń arnaıy lısenzııalarynyń birden-bir ıelenýshisi bolyp tabylady.
«Qazaqstan Arýy» ulttyq baıqaýy – jaı ǵana sulýlyq baıqaýy emes. Sońǵy jyldary ol «Sulýlyq pen qaıyrymdylyqtyń úılesimi!» degen uranmen ótkizilip júrgen úlken dýman. «Qazaqstan Arýy» baıqaýynyń jeńimpazdary meıirimdilikti óz erkimen atqaratyn Elshi bola otyryp, sulýlyq tájin is-áreketimen aqtaýy tıis. Qysqasy elde ótkiziletin qaıyrymdylyq jobalaryna belsene atsalysyp, elimizdiń barlyq jastaryna úlgi bolmaǵy da lázim.
Aınash ESALI
«Egemen Qazaqstan»
ALMATY