Elbasy N.Nazarbaevtyń halyqqa arnaǵan ár Joldaýy, maqalasy jáne Úndeýleri – asa ózekti, strategııalyq mańyzǵa ıe tarıhı saıası qujattar.
Parlament palatalarynyń birlesken otyrysynda óz otandastaryna arnaǵan «Prezıdenttiń bes áleýmettik bastamasy» atty Úndeýi buǵan deıingi «Bolashaqqa baǵdar: rýhanı jańǵyrý» maqalasy men «Tórtinshi ónerkásiptik revolıýsııa jaǵdaıyndaǵy damýdyń jańa múmkindikteri» atty Joldaýynyń zańdy jalǵasy. Úndeýdegi bes bastamany joǵaryda atalǵan baǵdarlamalardaǵy mindetterdiń oryndalýyn qamtamasyz etetin tetikter deýge de bolady. О́ıtkeni, bul bastamalar negizinen halyqtyń, onyń ishinde elimizdiń keleshegi jastardyń áleýmettik problemalaryn sheshýge arnalǵan.
Úndeýdiń birinshi bastamasy «Árbir otbasyna baspana alýdyń jańa múmkindikterin berý» dep atalady. Bul bastamasynda Elbasy baspana alýdyń «7 – 20 – 25»baǵdarlamasyn usynǵan. Baǵdarlamaǵa saı nesıege alynǵan qarajattyń ústemaqysy 14-16 paıyzdan 7 paıyzǵa deıin tómendep, bankke tólenetin bastapqy jarna 30-50 paıyzdan 20 paıyzǵa deıin qysqarǵan. Al tolyq tóleý merzimi 10-15 jyldan 25 jylǵa deıin uzartylmaq. Árıne bul shara qarapaıym azamattar men endi ǵana shańyraq kótergen jas jubaılar úshin úlken kómek bolady.
Elbasynyń 2019 jyldan bastap, jalaqy mólsheri 60 myń teńgeden aspaıtyn azmattardyń tabys salyǵyn 10 esege deıin qysqartý týraly usynysy da kópshiliktiń kóńilinen shyǵyp, qoldaýyna ıe bolyp otyr. Sondaı-aq Prezıdent Úndeýinde ózin-ózi jumyspen qamtyǵan jáne jumyssyz júrgen azmattar úshin shaǵyn nesıe berý tetikteri, eldi kógilder otynmen qamtamasyz etý máselesi de umyt qalmaǵan.
Elimizdiń stýdentteri men ustazdar qaýymy bilim alýdyń memleketten bólinetin granttar sanynyń 20 myńǵa deıin ulǵaıtylatyndyǵyn zor tebirenispen qarsy aldy desek artyq aıtqandyq bolmas. Sóz joq, bul shara joǵary bilim alýdy qoljetimdi etýdegi ıgi bastama bolmaq.
Sondaı-aq Prezıdenttiń Úkimetke 2022 jyldyń sońyna deıin 75 myń oryndyq jańa jataqhanalar salýdy tapsyrýyn, onyń stýdent jastarǵa degen ákelik qamqorlyǵynyń shynaıy kórinisi dep bilýimiz qajet.
Súıikti Otanymyzdyń halyqaralyq básekege qabilettiligi, onyń gúldene órkendep, álemniń meılinshe damyǵan 30 eliniń quramynan kórinýi jastardyń qolynda. Elbasynyń bıylǵy Joldaýynda kóterilgen tórtinshi ónerkásiptik revolıýsııany júzege asyrý tereń bilimdi, joǵary bilikti mamandarsyz tipti de múmkin emes. Qoǵamnyń negizi qozǵaýshy kúshi bolyp tabylatyn sol mamandar, bizdiń búgingi stýdenter. Mine, sondyqtan da Prezıdent stýdenterdiń áleýmettik jaǵdaıyn bir mezet te nazardan tys qaldyrǵan emes.
Halqyna arnaǵan óz Úndeýin Prezıdent: «Búgingi bastamalar elimiz tutas, qoǵamymyz turaqty bolsa ǵana tabysty júzege asady. Al el birligi – eń birinshi qazaqtyń birligi. Jahandyq kóshtiń basynda júretin mereıli el bolý úshin, birlik pen yntymaq aldymen ózimizge – qazaqqa kerek», dep túıindedi. Elbasynyń bul jerde sırek te bolsa baıqalyp qalatyn rýshyldyq, jershildik degen keleńsiz qubylystardy meńzep otyrǵandyǵy aıtpasa da túsinikti.
Yntymaq pen birligimizdi kózimizdiń qarashyǵyndaı saqtap, tý etip ustaıyq, qadirli aǵaıyn!
Sattar QÝAShBAI, ekonomıka ǵylymdarynyń doktory, professor