«Bolar istiń basyna, jaqsy keler qasyna», dep aıtqandaı eliniń erteńin oılaǵan Elbasy óziniń aıqyn bes bastamasyn halyqqa jarııa etti. El turǵyndarynyń turmys jaǵdaıyn odan ári jaqsarta túsýi tıis bul qadam der kezinde jasalyp otyr.
Bastamalar aıasynda usynylǵan baǵdarlamalar men is-sharalar eldiń eńsesin kótereri sózsiz. Atap aıtsam, baspana alýdyń jańa múmkindikteri boıynsha usynylǵan «7–20–25» baǵdarlamasy búgingi baspanasyz júrgen talaı otbasyna úlken kómek. Ásirese bolashaǵyna senim týdyrý úshin jas otbasylarǵa jasalyp jatqan jaqsy jaǵdaı dep aıtýǵa bolady. Eline óz úlesin qosý úshin eńbek etip etip júrgen bilimdi jastar barshylyq. Alaıda kóbinde otbasylyq-turmystyq jaǵdaılary nashar bolyp keledi. Osylaısha kúıbeń tirshilikten aryla almaı júrgen jastar endi qoljetimdi baspanamen qamtamasyz etiledi dep oılaımyn. Jalaqysy mardymsyz azamattarǵa salyq tólemin azaıtý jónindegi bastama da oryndy. Salyqty azaıtý arqyly olardyń jalaqysyn kóterý kózdelgen. Bastamada halyqqa áleýmettik turǵyda qoldaý kórsetiletindigi kóńilge senim uıalatady.
Eń bastysy, joǵary bilim alýdyń sapasy men qoljetimdiligin kóterý bastamasy qanshama jastardy tyǵyryqtan shyǵarary sózsiz. Elbasy usynǵan tehnıka salasyndaǵy memlekettik grantty kóbeıtý el ekonomıkasyn arttyrýdaǵy qajetti mamandyqtarǵa kóńil bólýdi bildiredi. Osy mamandyqtarǵa jastardy tartý úshin olarǵa jaǵdaı týǵyzý kerektigin atap kórsetken Elbasy joǵary oqý orny men kolledjderde jataqhana máselesin sheshý kerektigin basa aıtty. Osy bastama boıynsha salynatyn zamanaýı turǵydaǵy jańa jataqhanalar páter jaldap júrgen stýdentterdiń máselesin sheshedi. Olardyń tolyqqandy bilim alýyna jaǵdaı jasalatyny qýantady. Eldiń eńsesin kótergen bastamalardyń biri – shaǵyn nesıe berý kólemin keńeıtý. Bul óz kásibin bastap, sharýashylyǵyn keńeıtýdi kózdegen ár kásipkerge taptyrmas kómek. Qarjylaı kómekti qajet etetin árbir kásipker óz sharýashylyǵyn keńeıtýde memleket tarapynan jasalǵan bul qoldaýdy qýanyshpen qarsy alyp jatyr dep oılaımyn. Eldi kógildir otynmen qamtamasyz etýdi kózdegen besinshi bastama halyq turmysynda qordalanyp qalǵan talaı máseleni shesheri daýsyz. Ystyq sý máselesi, otyn tapshylyǵy sııaqty qarapaıym dúnıeler ásirese bizdiń Kókshetaý qalasy boıynsha qoljetimdi bolar edi. Osy bastamalardy azamattyq turǵydan qoldaımyn jáne jaqyn arada júzege asatynyna senemin.
Shattyq QARASARTOVA, M.Ǵabdýllın atyndaǵy №3 kóp tilde oqytatyn kásibı mektep-gımnazııanyń qazaq tili men ádebıeti páni muǵalimi
Aqmola oblysy