Qostanaı oblysynyń shalǵaı aýdandary kólik qatynastarynan oqshaý qalyp otyr. Parlament Senaty Tóraǵasynyń orynbasary Bektas Beknazarovpen kezdesýde Arqalyq qalasy men Jangeldın aýdanynyń turǵyndary temirjoldyń joqtyǵy týraly aıtty.
Jankeldın aýdanyndaǵy Torǵaı aýylynda jergilikti jurtshylyqpen kezdesýde aımaqta tolyqqandy kólik kommýnıkasııalaryn qalyptastyrý qajettigi týraly áńgime boldy. Oblys ortalyǵynan eń shalǵaı aýdan Qostanaıdan 500 shaqyrym shamasyndaǵy alysqa ornalasqan, ol elimizdiń basqa qalalarymen temirjol qatynasy joq. Osyǵan baılanysty Arqalyq-Torǵaı-Yrǵyz temirjol qurylysyn salý máselesi qoıylyp otyr. Odan basqa, aýdanda kádimgi janar-jaǵar maı quıý beketteri de jetispeıdi.
Jergilikti turǵyndar Jangeldın aýdanynyń aýmaǵy reseılik ǵarysh zymyrandarynyń qaldyq bólikteri qulaıtyn aýmaq retinde bólingenine alańdaýshylyq bildirip otyr. Kezdesýge qatysýshylar bul sheshimniń jaǵymsyz ekologııalyq zardaptary bolý múmkindikteri týraly aıtty. Odagn basqa, aýyl turǵyndary jerdiń «Altyn dala» tabıǵı qoryǵyna berilýine baılanysty mal jaıýǵa arnalǵan jerdiń joqtyǵyna shaǵymdaryn jetkizdi.
Arqalyq turǵyndary óz kezeginde Arqalyq-Shubarkól temirjoly boıynsha jolaýshylar tasymalyn jolǵa qoıýdy, sondaı-aq Arqalyqtan elimizdiń kóptegen aımaqtarynyń kólik qatynastaryn ońtaılandyrýǵa múmkindik beretinin tarmaqty ońtústik baǵytqa uzartý týraly ótinish aıtty.
Senat Tóraǵasynyń orynbasary Bektas Beknazarov Memleket basshysynyń barlyq qazaqstandyqtardyń ál-aýqatyn arttyrýǵa baǵyttalǵan bes áleýmettik bastamalary týraly kezdesýge qatysýshylarǵa aıtyp berdi. Ustazdar qaýymynyń mártebesi men bedelin kóterýge erekshe nazar aýdaryldy. Muǵalimder men ata-analar bilim mınıstrligin bilim berý júıesindegi úzdiksiz reformalardy oılastyryp baryp qolǵa alýǵa shaqyrdy. Jergilikti meshittiń ımamy mektepterde keleshekte dintaný pánin engizý týraly oılaryn ortaǵa saldy.
B. Beknazarov Arqalyq qalasyndaǵy ardagerlermen qoǵamdaǵy rýhanı ahýal jaıyn da talqylady. Atap aıtqanda, ol qoǵamdyq sanany jańǵyrtýǵa jáne qazaq halqynyń dástúrleri men mádenı muralaryn saqtaýǵa baǵyttalǵan «Rýhanı jańǵyrý» baǵdarlamasyn iske asyrýdyń mańyzdylyǵyn atap ótti.
Senat Tóraǵasynyń orynbasary aımaqtaǵy sot, quqyq qorǵaý jáne arnaýly organdar qyzmetkerlerimen áńgime barysynda ótken jyly qylmystyq jáne ákimshilik zańnamalyq aktilerdi jetildirýge baılanysty qabyldanǵan quqyqtyq reformany iske asyrý barysy týraly áńgimeledi. Sondaı-aq sot ókilettigindegi ózgeristerge, quqyq qorǵaý organdaryn reformalaýǵa, ekstremızm men terrorızmniń aldyn alýǵa qatysty máseleler de qaraldy.
Sharaǵa Senat depýtattary Serik Bekturǵanov jáne Jeńis Nurǵalıev, jergilikti ókildi jáne atqarýshy bılik organdarynyń basshylary qatysty.