Parlament Senatynyń depýtaty, Ekonomıkalyq saıasat, ınnovasııalyq damý jáne kásipkerlik komıtetiniń hatshysy Sársenbaı Eńsegenov elimizdiń aımaqtarǵa jumys babyndaǵy saparynda Atyraý oblysyndaǵy Qurmanǵazy aýdanynyń Asan aýyldyq okrýginde, Úshtaǵan aýylynda aýyldyq klýbynda turǵyndarmen kezdesý ótkizip, Memleket basshysynyń bes áleýmettik bastamasynyń mańyzyn jan-jaqty túsindirdi.
Halyqtyń áleýmettik jaǵdaıyn jaqsartýdy kózdeıtin qujatta árbir otbasyna baspana alýdaǵy jańa múmkindikter ashylyp, joǵary bilim alý, shaǵyn nesıe berý, eńbekaqy men salyq salasyndaǵy jańalyqtar týraly aıtyldy.
Senator elimizdiń aımaqtarǵa jumys sapary aıasynda Atyraý oblysynyń Qurmanǵazy aýdanyna qarasty Azǵyr óńirinde «7-shi razezd-Úshtaǵan-Asan-Azǵyr-Balqudyq-Súıindik» oblystyq mańyzy bar avtomobıl jolynyń sapasyn da qarady. Depýtatpen birge elimizdiń Investısııalar jáne damý mınıstrliginiń, Qazaqstan jol ǵylymı-zertteý ınstıtýtynyń, «Atyraýjolzerthanasynyń», Atyraý oblysynyń Jolaýshylar kóligi jáne avtomobıl joldary basqarmasynyń, sondaı-aq jergilikti ókildi jáne atqarýshy bılik organdarynyń ókilderi boldy.
Senator bastaǵan top Azǵyr óńirine aparatyn avtomobıl jolynyń jaǵdaıymen jáne paıdalanýǵa jaramdy bolýy múmkin jergilikti qurylys materıaldarynyń sapasymen tanysty.