Búgin Astanada qalalyq ákimdiktiń uıymdastyrýymen tasqynǵa qatysty jaǵdaıdy retteýge baǵyttalǵan sharalarmen tanystyrý baspasóz týry ótti. Respýblıkalyq buqaralyq aqparat quraldarynyń jýrnalısteri «Gazmashapparatýra» aýdanyndaǵy Esil ózeni jaǵasynda bolyp qaıtty, dep habarlaıdy elorda ákimdigi resmı saıty.
Baspasóz týry barysynda jergilikti bılik ókilderi jýrnalısterge qaladaǵy tasqynǵa qatysty jaǵdaı men júrgizilip jatqan aldyn alý sharalary aıtyp berdi.
Otyn-energetıkalyq keshen jáne kommýnaldy sharýashylyq basqarmasy jetekshisi orynbasarynyń mindetin atqarýshy Igor Alekseevtiń aıtýynsha, búgingi tańda elordada 27 ýchaskege sý basý qaýpi tónýi múmkin. Negizinen bul Úrker, Kóktal, О́ndiris turǵyn úı alaptary men jańa temirjol vokzaly aýdanynyń kósheleri.
«Ár ýchaske boıynsha jasalatyn jumystar, qajettiń materıaldyń kólemi, qarjylandyrý kólemi men jaýapty tulǵalar anyqtalǵan. Sonymen qatar, qala ákimi Áset Isekeshev osy jylǵa arnalǵan tasqyn sýdy ótkizýdi uıymdastyrý jónindegi keshendi jospardy bekitti», - dep málimdedi I.Alekseev.
Onyń aıtýyna qaraǵanda, Astana sý qoımasy men kontrretteýish jiti baqylaýda.
«Búgin sý kólemi 282 mln teksheni quraıdy. Bul jobalyq toltyrylýdyń 67%. Sý qoımasyna sekýndyna 18 kýb sý keledi. Biz qazir sekýndyna 5 kýb sýdy aǵyzyp jatyrmyz. Kontrretteýishte uzyndyǵy 2,5 shaqyrymdy quraıtyn qosymsha bermalardy ornatý jumystary aıaqtaldy. Qazirgi tańda kontrretteýishte 2,6 mıllıon kýb sý bar. Joba qýattylyǵy – 450 mıllıon kýb sýǵa deıin», - dedi ol.
Halyqaralyq «Nursultan Nazarbaev» áýejaıy men Nura-Esil arnasy aýdandarynda qala ákimdigi tazartý jumystaryn júrgizdi.
«Esil ózeniniń arnasy boıynsha barlyq sharalar oryndaldy. Biz qazir Esil ózeniniń sol jáne oń tarmaǵy birigetin «Gazmashapparatýra» aýdanyndamyz. Bul jerde ózenniń eski arnasyn salý jumystary júrgizildi. Bul óz kezeginde úsh saıajaı alaby ýchaskeleriniń sý astynda qalýyna jol bermeıdi. Salynǵan bógetterdiń uzyndyǵy 200 metrdi quraıdy», - dep túsindirdi I. Alekseev.
Onyń málimetinshe, Kishi Taldykól kóli aýdanynda atalmysh baǵyttaǵy jumystar qajettilik týyndaǵan jaǵdaıda júrgiziletin bolady. Úrker turǵyn úı alabynda uzyndyǵy 500 metrdi quraıtyn bóget qalpyna keltirildi.
Bıylǵy qysqy kezeńde qala syrtyna shyǵarylǵan qar kólemi 3,1 mıllıon teksheni qurady. Bul baǵyttaǵy jumystarǵa arnaıy tehnıkanyń 260 birligi jumyldyryldy.