Elbasy «Astana Bas jospary» ǵylymı-zertteý jobalyq ınstıtýty» jaýapkershiligi shekteýli seriktestiginde boldy. Bul týraly akorda.kz habarlady.
Memleket basshysy elordany abattandyrý jónindegi jobalardyń iske asyrylý barysymen, sondaı-aq qalanyń ınfraqurylymdyq jáne áleýmettik-mádenı nysandarynyń qurylys josparymen tanysty.
Nursultan Nazarbaev Astanada jańa sáýlet jáne logıstıka ǵamarattaryn salý kezinde qala qurylysy salasyndaǵy álemdik jetistikterdi zerttep, olardy qoldaný qajettigin atap ótti.
Qazaqstan Prezıdenti qaladaǵy ómir súrý sapasy men jaıly turmys deńgeıin arttyrýǵa baǵyttalǵan áleýmettik jobalardy iske asyrýdyń mańyzdy ekenin aıtty.
Sonymen qatar, Memleket basshysy elordanyń 20 jyldyǵyna arnalǵan merekelik is-sharalardy uıymdastyryp, ótkizý máselesine basa nazar aýdardy.
– Biz 20 jyl ishinde Uly Dalanyń dál ortasynda búkil álemge tanylǵan jańa ásem qala turǵyzdyq. Bul qala halqymyzdyń maqtanyshyna aınaldy. Árıne, bul – qala ákimshiliginiń, qurylysshylardyń, sáýletshiler men osy úderiske atsalysqan kóptegen adamnyń mańdaı teriniń jemisi. Biz bıyl elordamyzdyń 20 jyldyǵyn toılaımyz. Qonaqtarymyzdyń bárine elordanyń jıyrma jylda qol jetkizgen tartymdylyǵyn, ásemdigin jáne tynys-tirshiliginiń joǵary deńgeıde ekenin kórsetýimiz qajet, – dedi Elbasy.
Sondaı-aq, Astana qalasynyń ákimi elordany odan ári damytý jáne qala turǵyndarynyń ómir súrý jaǵdaıyn jaqsartýdyń negizgi kórsetkishterine qol jetkizý úshin atqarylyp jatqan jumystar jóninde baıandady.
Sońynda Nursultan Nazarbaev birqatar naqty tapsyrma berdi.