Elbasy Nursultan Nazarbaevtyń «Bolashaqqa baǵdar: rýhanı jańǵyrý» atty baǵdarlamalyq maqalasynan týyndaıtyn mindetterdi júzege asyrý, el men jerdiń tarıhyn tanytatyn jobalardy qolǵa alý máselesi ózekti. Sonymen qatar Prezıdenttiń «Týǵan jerge týyńdy tik!» aksııasy boıynsha da jumystar atqarý eldik pen erlikti dáripteıtin dúnıe.
Qazaqtyń qaı qıyry da qasıetti. Ulan-ǵaıyr uly dalamyzda ómir súrip, ónegeli isterimen tanylǵan tulǵalar da jeterlik. Osyndaı tuǵyrly tulǵalardy jas urpaqqa tanytý, olardyń ónegeli isterin dáripteý de rýhanııat álemine kórsetilgen qurmet. Osy oraıda Sarysý aýdanynyń ortalyǵy Jańatas qalasynda jergilikti kásipker, «Altyn Orda» JShS dırektory Dáýletaldy Janbaevtyń demeýshiligimen jaryq kórgen «Qarasý – Atamekenim» kitabynyń tusaýkeseri ótti. Atalǵan kitapqa kezinde Táýke hannyń bas bıi bolǵan Eseı bı, Jaryqbas batyr, Bóltirik sheshen, Ernazar áýlıe, han Jambyl sekildi tulǵalardyń el taǵdyry úshin bılik aıtqan kezeńderinen tarıhı derekter keltirilgen. Kitaptyń negizgi mazmuny – jońǵar shapqynshylyǵy, qoqan qyspaǵy, odan keıin orys pen qyrǵyzdyń qazaq halqyna kúsh kórsetýi sııaqty oqıǵalardy arqaý ete otyryp, el úshin etigimen sý keshken bahadúr babalardyń erligin dáripteý. Sonymen qatar atalǵan tarıhı tulǵalar urpaǵynyń el aýzynan jınaǵan áńgimeleri, urpaqtar sabaqtastyǵy arqyly hatqa túsken estelikteri toptastyrylǵan.
– Qarasý eldi mekeni Ońtústik Qazaqstan oblysy Báıdibek aýdany qazirgi Alǵabas keńsharynyń soltústik jaǵynda Jambyl oblysynyń Sarysý aýdanyna shektes Arystandy, Qospasý, Úsiktas eldi mekenderi ózenderiniń toǵysqan jerinde ornalasqan. Osy kitapty shyǵarý barysynda áńgimemizge arqaý bolǵan keshegi ótken bahadúr babalar jóninde Ońtústik Qazaqstan oblysy jáne Jambyl oblysyndaǵy sol babalardan qalǵan, qazirgi ómir súrip jatqan urpaqtarymen tildesýdiń sáti tústi. Sol aǵalaryma, baýyrlaryma jáne de basqa aǵaıyndarǵa sheksiz alǵysymdy bildiremin, – deıdi Dáýletaldy Janbaev.
Kitaptyń tusaýkeser rásimine qatysqan kópshilik qaýym atalǵan eńbektiń máni men mańyzyna toqtalyp, ózderiniń pikirlerin bildirdi. Elbasynyń «Bolashaqqa baǵdar: rýhanı jańǵyrý» baǵdarlamalyq maqalasy aıasynda jaryq kórgen kitaptyń oqyrmanǵa bereri mol.
Hamıt Esaman,
«Egemen Qazaqstan»
Jambyl oblysy