Búginde «Dıplommen – aýylǵa!» baǵdarlamasymen aýylǵa baratyn jas mamandar qatary az emes. Biraq memleketten alatyn bir ret beriletin járdemaqy kómegine úı satyp ala almaıdy, óıtkeni qarjy jetpeıdi. Mamandardyń aýylǵa turaqtamaýynyń basty sebebiniń biri osy.
«Biz Ulttyq ekonomıka mınıstrligine baǵdarlamaǵa qatysýshylar úshin bir ret beriletin járdemaqynyń kólemin 70 AEK-den 200 AEK deıin kóterýdi, úı alý nemese úı salyp alý úshin beriletin bıýdjettik nesıeniń kólemin 1500 AEK-nen 1700 AEK deıin kóterýge usynys joldadyq» dedi oblystyq Ekonomıka jáne bıýdjettik josparlaý basqarmasynyń basshysy Baqytbek Esenǵulov.
Sonymen qatar usynysta aýylǵa baratyn mamandar, ıaǵnı baǵdarlamaǵa qatysýshylar tizimin kóbeıtýdi de usyndy. О́ıtkeni aýylda tek muǵalim men dáriger, veterınar ǵana emes, ekonomıster, zańgerler, býhgalterler de jetispeıdi.
2009 jyl men 2017 jyl arasynda oblysta 4336 jas maman baǵdarlamaǵa qatysqan. Olarǵa bıýdjetten 4,3 mlrd teńge qarjy jumsalǵan. Osy jyldar ishinde 793 maman kelisimdi merzimnen buryn buzǵan.
Názıra Járimbet
«Egemen Qazaqstan»
Qostanaı