Madrıd qalasynda (Ispanııa) «Azııa úıi» konsorsıýmy jáne Qazaqstan Respýblıkasynyń Tuńǵysh Prezıdenti – Elbasy Qory arasynda memorandýmǵa qol qoıyldy. Sonymen qatar «Astana – uly dalanyń injý-marjany» atty fotokórme ótti.
Memorandýmǵa Qazaqstan men Ispanııa halyqtary arasyndaǵy dástúrli dostyqty, ózara túsinistik pen senimdilikti odan ári nyǵaıtý, dostyq qatynas ornatý jáne eki uıymnyń arasyndaǵy jan-jaqty yntymaqtastyqty keńeıtý, jastar almasýyn ilgeriletý, áleýmettik, mádenı, ǵylymı, bilim berý jáne basqa da salalardaǵy yntymaqtastyqty damytý, jan-jaqty strategııalyq áriptestikti ulǵaıtý maqsatynda qol qoıyldy.
Memorandýmǵa qol qoıýǵa «Azııa úıi» bas dırektory Devıd Navarro Garsııa jáne Elbasy Qory atqarýshy dırektorynyń orynbasary Sultan Aıtjanov qatysty.
Ekijaqty yntymaqtastyq boıynsha birlesken is-sharalar ótkizý, Qazaqstan men Ispanııa jastarynyń dostyq saparlary, bilim berý, ǵylym, mádenıet salasyndaǵy birlesken jobalar men baǵdarlamalardy ázirleý jáne iske asyrý jáne ýnıversıtetter, zertteý ortalyqtary jáne basqa da mekemelermen tikeleı yntymaqtastyq aıasynda júzege asyrylady.
«Azııa úıi» – Azııa men Tynyq muhıty elderinde mamandandyrylǵan mádenı jáne bilim berý mekemesi. Barselonada ornalasqan bul mádenı ortalyq kórmeler, konferensııalar men semınarlar uıymdastyrady. Ortalyq zertteý-taldaý jumystarymen aınalysýǵa múmkindik beredi. «Azııa úıi» 2001 jyly Ispanııa úkimetiniń Syrtqy ister jáne yntymaqtastyq mınıstrligi, Katalonııa úkimeti, Barselona men Madrıd qalalyq keńesterimen birlese quryldy.
Budan basqa, Elbasy Qory tarapynan Madrıdte «Astana – uly dalanyń injý-marjany» atty fotokórme usynyldy.
Fotokórme Ispanııa koroli Fılıpp VI 2014 jyly ashqan Karlos de Amberes Qorynyń (Fundación Carlos de Amberes) ǵımaratynda ótti.
Fotokórmeni ashý barysynda Qazaqstannyń Ispanııa Koroldigindegi Tótenshe jáne ókiletti elshisi Baqyt Dúısenbaev jáne Qazaqstan Respýblıkasynyń Tuńǵysh Prezıdenti – Elbasy Qory atqarýshy dırektorynyń orynbasary Sultan Aıtjanov quttyqtaý sóz sóıledi.
Astana qurylystarynyń 100-den astam kartınalary jáne «Beımálim Qazaqstan» fotosýretter serııasynan turatyn Qazaqstannyń biregeı tabıǵaty kórsetilgen fotokórmeni tamashalaýǵa belgili qoǵam jáne saıası qaıratkerler, sondaı-aq Ispanııanyń mádenıet jáne óner maıtalmandary keldi.
Qonaqtar Uly dalanyń, Eýrazııa júregindegi ýltrazamanaýı qalanyń sulýlyǵy men beınesin jarqyn fotosýretter arqyly tamashalady.
Sonymen birge kórme qonaqtaryna Elbasy Qorynyń tapsyrysy boıynsha ázirlengen «A day in Astana» fotoalbomy syıǵa tartyldy.
«Egemen-aqparat»