Memleket basshysynyń Qazaqstan halqyna arnaǵan bes áleýmettik bastamasy atap kórsetilgen Úndeý qazaqstandyqtardy bir serpiltip tastaǵan bolatyn. Elbasynyń «Tórtinshi ónerkásiptik revolıýsııa jaǵdaıyndaǵy damýdyń jańa múmkindikteri» atty Joldaýynda atap kórsetilgen mindetterdi oryndaýda bul Úndeýdiń alatyn orny erekshe dep oılaımyn.
Sebebi osy Joldaýda atap kórsetilgendeı, táýelsiz Qazaqstannyń basty baılyǵy adam kapıtaly ekeni ras. Iаǵnı, Joldaýda belgilengen el ekonomıkasy damýynyń 10 strategııalyq mindetin júzege asyratyn Qazaqstan azamattary ekendigin eskersek, respýblıka turǵyndarynyń áleýmettik máselelerin sheshýdi jeńildetýge baǵyttalǵan bul Úndeýdiń mańyzy eselep arta túseri anyq.
Sondaı-aq Úndeýde «Jumys isteıtin árbir adam nesıege páter satyp alyp, ony otbasylyq bıýdjetiniń múmkindikteri aıasynda tóleı alatyndaı bolýy úshin arzan resýrstar usynatyn tetikter qajet. Sondyqtan men «7 – 20 – 25» baǵdarlamasyn usynamyn. Jumys isteıtin árbir qazaqstandyq tómendegideı sharttar boıynsha teńgemen nesıe alý múmkindigine ıe bolady. Nesıe ósiminiń mólsherlemesi qazirgideı 14-16 emes, jylyna 7 paıyzdan aspaıtyn bolady», dep naqtylanýyn balalarymyz úshin, bolashaq urpaq úshin jasalyp jatqan úlken ákelik qamqorlyq, teńdessiz tartý dep túsingen abzal. Tómengi paıyzben beriletin ıpotekalyq turǵyn úıler el jastarynyń baspana máselesin birjola sheshýge baǵyttalǵan mańyzdy betburys dep esepteımin.
Úndeýdegi «Salystyrmaly túrde jalaqysy tómen qazaqstandyqtardy qoldaý úshin 2019 jyldyń 1 qańtarynan bastap olardyń salyq júktemesin 10 esege azaıtyp, 1 paıyz ǵana salyq salýdy usynamyn. Aı saıyn eń tómengi eseptik kórsetkishtiń 25 eselengen kóleminen az jalaqy alatyndarǵa salynatyn jeke tabys salyǵyn azaıtý arqyly olardyń salyq júktemesin jeńildetý kerek. Al osylaısha salyqty azaıtýdan shyǵatyn qarjy olardyń jalaqysyn kóbeıtýge jumsalýy qajet», degen joldar turmysy tómen otbasylardyń jaǵdaıyn jaqsartýǵa, áleýmettik teńsizdikti azaıtýǵa, turǵyndardyń ál-aýqatyn kóterýge baǵyttalǵan oń sheshim. Menińshe, der kezinde qabyldanǵan osy baǵdarlama qazaqstandyqtardyń turmysyn jaqsartýmen birge, eldegi keıbir áleýmettik toptardyń arasynda oryn alyp jatqan teris túsinikterdiń aldyn alýǵa septesetindigi anyq.
Eń bastysy, stýdentterge arnap 75 myń oryndyq jataqhanalar salý týraly bastama buqara halyq pen jastarymyzdyń úlken rızashylyq sezimin týǵyzdy. Úndeýde aıtylǵan usynystar jastardyń elimizdiń jáne shetelderdiń JOO-da tolyqqandy jáne tegin bilim alýyna jańa kókjıekter ashyp otyr dep túsinemin.
Búginde Qazaqstan halqynyń edáýir bóligi orta jáne shaǵyn kásippen aınalysýda. Naryq zańdylyǵy da osyny talap etedi. Álemdik ekonomıkalyq daǵdarys jaǵdaıynda turǵyndardyń ózin-ózi eńbekpen qamtýy úshin bul da asa mańyzdy másele. Osy oraıda Memleket basshysynyń «2018 jyly qosymsha 20 mıllıard teńge bólip, shaǵyn nesıelerdiń jalpy somasyn 62 mıllıard teńgege jetkizýdi tapsyramyn», degen bastamasyn der kezinde kóterilgen óte baǵaly sheshim retinde baǵalaımyn.
Úndeýdegi «Biz Qaraózek (Qyzylorda oblysy) – Jezqazǵan – Qaraǵandy –Temirtaý – Astana baǵytynda magıstraldy gaz qubyryn salý jobasyn júzege asyrýymyz kerek», – degen joldardy oqyǵanda keýdemizdi maqtanysh kernedi. Osy oraıda biz, qyzylordalyqtar elimizdiń júregi – Astanaǵa kópten beri jetpeı turǵan kógildir otynnyń Qyzylorda oblysynyń terrıtorııasynan tartylatyndyǵyna shyn júrekten qýanǵanymyzdy jetkizgimiz keledi. Mine, Prezıdenttiń bastamasymen «Syr – Alashtyń anasy» degen sóz shyndyqqa aınaldy.
Serikbaı QOSAN,
Qyzylorda oblystyq «Rýhanı jańǵyrý» ortalyǵynyń bólim meńgerýshisi