Halqymyzda «Táýekel túbi – jel qaıyq, ótesiń de ketesiń» degen qanatty sóz bar. Qalam ustaǵan aǵaıyn bolǵan soń eldiń oıyn baǵyp júremiz. Baıqaıtynymyz, kóp adamnyń táýekelge tisi bata bermeıdi. О́z múmkindigine sene bermeıdi. Al bar qorqynyshty boıyńnan sypyryp tastasań túk te emes. Aspannan jańbyr surasa aqsha jaýatyn baı bolmassyń, biraq eshkimnen kem ómir súrmeıtiniń aıdan anyq. Bala-shaǵań baqýat.
Qarapaıym úlgi retinde aıtaıyq, Jańaqorǵan aýdany M.Nálibaev aýylynyń turǵyny Bekseıit Sársekbaev ári-sári bolyp júrgen adamdarǵa jaqsy úlgi bola alady. Ol «Atameken» ulttyq kásipkerlik palatasynan eki mıllıon teńge nesıe alady da, sol qarjysynyń murtyn buzbastan 550 taýyq, 100-ge jýyq kúrketaýyq satyp alady. Osy maqsat úshin arnaıy salyp alǵan qora-jaıynda baǵyp, basyn kóbeıtip otyr. Búgingi jańa tehnologııalar taýyqtyń kúrk bolǵandyǵyn kútpeı-aq arnaýly apparattarmen balapan bastyra beredi. Kásipker tabıǵı jolmen kóbeıtý jaǵyna da kóńil aýdarady. Qazir ol eki-úsh myń balapan basyn baǵyp-qaǵý úshin jyly qora salyp jatyr. Qajetti negizgi dárýmender Reseı naryǵynda bolǵanymen, onyń da oıaby tabylar degen nıette.
О́ziniń de jeri bar kásipker júgeri alqabyn ulǵaıtpaq. Ázirge ózge sharýalardan keregin aıyryp otyr. Qus sharýashylyǵy tańerteń albardan jaıylymǵa aıdap shyǵaratyn, syrtynan baıqastap keshke qoralaıtyn mal emes, óziniń basqa qyzyq-shyjyǵy jetedi. Qajetti ortasha jylý saqtalý kerek. Kúrketaýyqqa jaqsy bap kerek. Balapan kezinde óte náránjý bolady. Tumsyǵy qattylaý jerge tıse de kózi alaryp qulap qala beredi. Al ósken soń naǵyz jany siri qusyńyz osy. Aıazdy kúnderi jelge keýdesin tosyp, sýyq sorǵan saıyn semiredi. Onyń ústine kishigirim toqty-torymdaı bolatyn kúrketaýyqtan túsetin paıda da jaqsy.
Búginde Qazaqstan ulan-ǵaıyr jeri bola tura ózin aýylsharýashylyq ónimderimen tolyq qamtyp otyr dep maqtana almaımyz. Muny Elbasymyz da jıi aıtady. Úkimetke osyǵan qatysty naqty tapsyrmalar berilip otyr. О́kinishke qaraı, syrttan tasymaldanatyn ónimder óte kóp. Eger aýylda turatyn, táýekeldiń qaıyǵyna qaımyqpastan minetin Bekseıit sııaqty azamattar kóp bolsa, bul qazaqtyń asyǵy alshysynan túser edi-aý dep oıladyq. Jumys joq dep bala-shaǵaǵa beriletin járdemaqyǵa kóz súzetin jigitterge oı túse me dep. Aqshany qaıdan alamyn deıtindeı emes, Bekseıit sııaqty ortasha sharýalar jolyn kórsetip otyr.
Baqtııar TAIJAN,
«Egemen Qazaqstan»
Qyzylorda oblysy