Jastar saraıynda Muhamedqanapııa Bahramulynyń (Segiz seri) 200 jyldyǵyna oraı II respýblıkalyq «Gaýhar tas» orkestrler men ulttyq aspaptar ansambliniń festıvali ótti.
«Rýhanı jańǵyrý» baǵdarlamasy aıasynda uıymdastyrylǵan baıqaýdyń ashylý saltanatynda oblys ákiminiń orynbasary Madııar Qojahmet elimizdiń aımaqtarynan kelgen 300-deı ónerpazǵa jyly lebizin arnady.
Shyǵarmashylyq ujymdardyń ózara baılanysyn arttyryp, talanttylardyń ónerine qoldaý jasaýdy dittegen festıvalda tórt orkestrdiń, bes folklorlyq ansambldiń súıemeldeýimen Segiz seriniń ánderi oryndaldy.
Astana qalasy fılarmonııasynyń halyq mýzykasy ansambliniń jetekshisi Toǵjan Jahın mundaı festıvalderdi júıeli túrde uıymdastyrýdyń qajettigin atap ótti.
«Ulttyq ánderimiz ben kúılerimiz arqyly jas urpaq boıyna týǵan jerge, elge degen azamattyq súıispenshiligin ornyqtyrýymyz kerek.Sońǵy jyldary jastardyń halyqtyq mýzykaǵa degen qoshemeti artyp keledi. Endi Segiz seri shyǵarmalaryn da jaqsy biletin bolady», deıdi ol.
Festıval sheńberinde tórt konsert qoıylyp, onyń sońy aýqymdy gala-konsertke ulasty.
О́mir Esqalı
«Egemen Qazaqstan»
Soltústik Qazaqstan oblysy