Elimizdiń barlyq óńirlerinde 2017 jylǵy 1 qarashadan mekenjaıdy tirkeý kodtary negizindegi «Halyqty qujattandyrý jáne tirkeý» aqparattyq júıesi arqyly meken-jaı málimetterin jańa formatqa engizý jónindegi jańa servıs iske qosylǵan bolatyn.
Bul qyzmet jańa júıege málimetter engizý jolymen júzege asyrylady. Degenmen jańa servıs qosylǵaly, ınternat-mektepter men qarttar úılerinde, jataqhanalarda turyp jatqan azamattardan tirkeýge qatysty ótinish túsken jaǵdaıda olardy atalǵan aqparattyq júıege málimetter engizý jolymen tirkeý múmkindigi joq, óıtkeni atalǵan qyzmet túri tek turǵyn úı qoryna enetin obektiler turǵyndaryn ǵana tirkeýdi júzege asyrady.
Al joǵaryda atalǵan obektiler kategorııasy mekenjaılyq regıstr málimetterine sáıkes ne densaýlyq saqtaý men demalys obektilerine, ne bilim berý obektilerine nemese kommýnaldyq qyzmet kórsetý obektilerine jatqyzylyp, áıteýir turǵyn úı qoryna qatyssyz qalǵan. Bul jańa servıs iske qosylǵanda másele týdyryp otyrǵanyn aıta ketken jón jáne ol áleýmettik nysandardy tirkeý úshin sońǵy bes jarym aıdyń ishinde kelip jatqan turǵyndarǵa qatysty bolyp otyr.
Turatyn jeri boıynsha tirkelýge qatysty qıyndyq týǵandyqtyń saldarynan osy kategorııadaǵy azamattar asyraýshysynan aıyrylýyna baılanysty tólenetin járdemaqy, memlekettik járdemaqy taǵaıyndaýǵa jáne zeınetaqy tólemderin alýǵa baılanysty kedergilerge ushyrap otyr. Onyń ústine osy sanattaǵylardyń turyp jatqan mekenjaıǵa der kezinde tirkelýin rettemegen basshylyqqa ákimshilik jaýapkershilik te qarastyrylǵan.
Biz osy máseleni Premer-Mınıstrdiń orynbasary Asqar Jumaǵalıevke bildirip, «Halyqty qujattandyrý jáne tirkeý» aqparattyq júıesindegi jyljymaıtyn múlik obektileriniń tizimin keńeıtýdi suradyq.
Álııa SAPAROVA,
Májilis depýtaty