Mamyrdyń 17-18 kúnderi Astana memlekettik qyzmet habynyń bastamasymen Estonııa sarapshysy qazaqstandyq densaýlyq saqtaý, aqparattyq tehnologııa jáne memlekettik qyzmet kórsetý salalaryndaǵy qyzmetkerlermen azamattarǵa medısınalyq qyzmet kórsetýde aqparattyq tehnologııalardy qoldaný tájirıbesimen bólisti. Atap aıtqanda, «Estonııanyń elektrondyq densaýlyq saqtaý aqparattyq júıesi: tájirıbe, syn-tegeýrinder jáne perspektıvalar» taqyrybynda semınar uıymdastyryldy.
Estonııadaǵy densaýlyq saqtaý salasynda sıfrlyq tehnologııalardy qoldaný men damytýdaǵy tájirıbelik tájirıbeni Estonııa Prezıdentiniń burynǵy keńesshisi Madıs Tıık tanystyrdy. Madıs Tıık - Estonııa elektrondyq densaýlyq saqtaý júıesi ázirleýshilerdiń biri jáne elektrondyq densaýlyq saqtaý salasyndaǵy reformalardy, túrli zertteýler men jobalardy júzege asyrýda úlken tájirıbeci bar.
Estonııa - sıfrlyq memlekettik basqarý, sonyń ishinde elektrondyq densaýlyq saqtaý salasynda álemdik kóshbasshylardyń biri. 2008 jyly Estonııa azamattardyń týǵanynan ólimine deıingi barlyq medısınalyq málimetterdi jınaqtaıtyn elektrondyq medısınalyq kartalar júıesin tolyq engizgen alǵashqy el boldy. 2009 jyly Estonııa búkil medısınalyq qujattardy bir elektrondy júıege engizýge múmkindik beretin densaýlyq saqtaý aqparatymen almasý mehanızmin iske qosty. Estonııanyń osy saladaǵy tájirıbesi Qazaqstan úshin úlken qyzyǵýshylyq týdyrýda.
Semınarǵa densaýlyq saqtaý mınıstirliginiń jetekshi qyzmetkerleri men mamandary, medısına mekemelerdiń bas dárigerleri, Prezıdent Ákimshiliginiń medısına ortalyǵy, Astana qalasynyń densaýlyq saqtaý basqarmasy, «Nazarbaev Ýnıversıteti», «Zerde» holdınginiń jáne «Azamattarǵa arnalǵan úkimet» memlekettik korporasııasy qyzmetkerleri qatysty.
Astana memlekettik qyzmet habymen qatar semınardy «Nazarbaev Ýnıversıteti» jáne «Qoǵamdyq aýdıt» Ulttyq seriktestik platformasy qaýymdastyǵy uıymdastyrdy.