Memleket basshysy rásimge qatysýshylarǵa arnalǵan sózinde «KADEX-2018» kórmesi aıasynda «Qazaqstandaǵy ǵarysh kúnderi» atty halyqaralyq forýmnyń ótýi bıylǵy sharanyń basty ereksheligi ekenin atap ótti.
Qazaqstan Prezıdenti «KADEX-2018» kórmesiniń qarý-jaraq pen aqparattyq qaýipsizdikti qamtamasyz etý salasyndaǵy álemdik mańyzy bar jıynǵa aınalǵanyn aıtty.
– Kórmege álemniń 28 elinen 318 kompanııa qatysyp otyr. Kórme qonaqtary qorǵanys ónerkásibi kesheni jáne ǵarysh salasyndaǵy sońǵy jetistiktermen tanysa alady. Bul joly elektrondyq júıe men baılanys jáne qarý-jaraqty basqarý júıesin damytýǵa aıryqsha mán berildi, – dedi Nursultan Nazarbaev.
Elbasy Qazaqstannyń tatý kórshilik pen yntymaqtastyqty nyǵaıtýǵa baǵyttalǵan beıbit saıasat júrgizip otyrǵanyn atap ótti.
– Qorǵanys salasy men Qarýly Kúshterdiń áleýetin damytý – memleket basymdyqtarynyń biri. Ortalyq Azııa boıynsha biregeı sanalatyn «KADEX» halyqaralyq kórmesi bul basymdyqtardy iske asyrýdyń tıimdi quraly bolyp tabylady, – dedi Memleket basshysy.
Qazaqstan Prezıdenti elimizdiń qorǵanys ónerkásibi keshenin damytý úshin halyqaralyq kórmeni ótkizýdiń tıimdiligine toqtaldy.
– Bıyl kórmege qatysý úshin álemniń 40 elinen resmı delegasııalar men sheteldik 108 kompanııa basshylary keldi. Qol qoıylatyn iskerlik kelisimder men sharttar otandyq jáne sheteldik qorǵanys ónerkásibi kesheniniń kásiporyndary arasyndaǵy halyqaralyq kooperasııa men seriktestikti damytýǵa septigin tıgizetin bolady. Sondaı-aq, bul ınvestısııa tartyp, jalpy Qazaqstan ekonomıkasynyń eksporttyq áleýeti men básekege qabilettigin arttyrýǵa yqpal etedi, – dedi Nursultan Nazarbaev.
Kórmeniń ashylý rásimi aıaqtalǵannan keıin Elbasy «Qazaqstan Injınırıng» ulttyq kompanııasynyń, Reseı men Qytaıdyń pavılondaryn aralap kórdi.