Oblystyq Qazaqstan halqy Assambleıasy men «Qoǵamdyq kelisim» mekemesiniń bastamasymen qaıyrymdylyq baly úshinshi ret ótkizildi. Sońǵy eki aksııa kezinde 5 mıllıon teńge jınalyp, jeti baldyrǵannyń densaýlyǵyn túzeýge baǵyttalǵan bolatyn.
Bul joly jandaryn dert, qabaqtaryn muń shalǵan Ámir Ǵabdýllın, Karına Baımoldına, Vladıslava Golovyrınanyń em-domyna jumsaýǵa sheshim qabyldandy. Kóp balaly otbasynda tárbıelenetin Karına mıdyń kıstozdy-glıozdy ózgerýine jastaıynan shaldyqqan. Býyn aýrýynyń sozylmaly túri meńdegen Vladıslava ómiriniń kóp bóligin aýrýhanada ótkizip keledi. Ámirge qoıylǵan ahondroplazııa dıagnozy túni boıy janyn jegideı jep shyǵady. Ota jasalǵanymen, alda taǵy bir beınet kútip tur. Ýkraınada jasalatyn kezekti operasııaǵa barmaq.
Balmaskarad túrinde uıymdastyrylǵan keshte oblys ákiminiń orynbasary Madııar Qojahmet Elbasynyń qoldaýymen «Birlik – qaıyrymdylyq arqyly» sharasy júıeli ótkizilip, jaqsy dástúr óńirde keń qanat jaıǵanyn atap ótip, az qamtylǵan otbasylardyń kembaǵal balalaryna jan-jaqty qarjylyq qoldaý kórsetýdi ditteıtin jobaǵa belsene atsalysýǵa shaqyrdy.
Qaıyrymdylyq balyna ortaqtasqan kásipkerler, qaltaly azamattar kishkentaı baldyrǵandardyń ónerin qyzyǵa tamashalady. Konserttik baǵdarlamadan keıin aýksıon uıymdastyrylyp, 4 mıllıon 642 myń teńgeniń buıymdary men zattary satyldy.
Aksııa sońynda balǵa qatysýshylar fleshmob bılep, jınalǵandarǵa kóterińki kóńil kúı syılady.
О́mir ESQALI,
«Egemen Qazaqstan»
Soltústik Qazaqstan oblysy