Lıssabonda Qazaqstannyń Fransııadaǵy Elshisi jáne Portýgalııadaǵy Elshi qyzmetin qosa atqarýshy Jan Ǵalıev Portýgalııa Respýblıkasynyń Prezıdenti Marselý Rebelý dı Sozaǵa senim gramotalaryn tapsyrdy,dep habarlaıdy Syrtqy ister mınıstrliginiń baspasóz qyzmeti.
Saltanatty rásimnen keıin bolǵan ekijaqty kezdesýde saıası dıalog, saýda-ekonomıkalyq jáne ınvestısııalyq yntymaqtastyqty nyǵaıtý, IT-ındýstrııa, sıfrlandyrý, jasyl tehnologııalar jáne týrızm salasyndaǵy yntymaqtastyqty jandandyrý máseleleri talqylandy.
Elshi Portýgalııa basshysyn elimizdegi jańǵyrtý baǵdarlamalary aıasynda bolyp jatqan aýqymdy ekonomıkalyq jáne saıası reformalarmen jáne Memleket basshysynyń «Tórtinshi ónerkásiptik revolıýsııa jaǵdaıyndaǵy damýdyń jańa múmkindikteri» joldaýynyń basty baǵyttarymen tanystyrdy.
О́z kezeginde Prezıdent Marselý Rebelý dı Soza Qazaqstan Prezıdenti Nursultan Nazarbaevtyń jetekshilik etýimen eldiń qarqyndy damýyna joǵary baǵa berip, aldaǵy Astana qalasynyń 20 jyldyǵymen quttyqtady. Sondaı-aq, Portýgalııa basshysy eldegi memlekettik baǵdarlamalardy júzege asyrýda tabystar tiledi jáne Portýgalııanyń Qazaqstanmen eki jaqty yntymaqtastyqty jandandyrýǵa talpynysyn atap ótti. Osyǵan baılanysty ol aldaǵy ýaqytta Lıssabonda qazaqstan-portýgal ınvestısııalyq forýmyn ótkizýge qyzyǵýshylyq tanytty.
Sapar aıasynda J. Ǵalıev Portýgalııa Syrtqy ister mınıstrliginde Bas hatshy Alvaro Mendonso ı Moramen, Bas saıası dırektor Pedro Kosta Pereıramen, Protokol jetekshisi Klara Nýnes dýsh Santýshpen, Eýropa isteri departamentynyń dırektory Antonıo Sabıdo Kosta jáne halyqaralyq uıymdar departamenty dırektory Vera Avılamen bólek kezdesýler ótkizdi.
Taraptar 29 naýryzda Astana qalasynda ótkizilgen Syrtqy ister mınıstrlikteri arasyndaǵy saıası konsýltasııalardyń sátti ótýin atap ótip, eki jaqty yntymaqtastyqty odan ári nyǵaıtý jáne naqty jobalarǵa kóshý jónindegi aldaǵy mindettemelerdi rastady.
Kezdesýlerde eki el arasyndaǵy qarym-qatynastyń quqyqtyq bazasyn quraıtyn negizgi qujattardy qarastyrý barysy men qol qoıý múmkindigi talqyǵa salyndy, olardyń arasynda ekonomıkalyq, saýda jáne tehnıkalyq yntymaqtastyq jóninde, ekijaqty salyq salýdy aldyn-alý, quqyqtyq qoldaý jáne týrızm jónindegi kelisimder bar.
Sonymen qatar, halyqaralyq uıymdar aıasyndaǵy yntymaqtastyq máseleleri qaraldy. Portýgalııa tarapy Astananyń Eýropalyq Odaqpen jáne Eýropa Keńesimen yntymaqtasý jónindegi kúsh-jigerin, EQYU men BUU aıasyndaǵy belsendi jumysyn atap ótti. Qazaqstandyq dıplomat 2017-2018 jj. BUU Qaýipsizdik keńesinde Qazaqstannyń kandıdatýrasyn qoldaǵany úshin Portýgalııaǵa alǵysyn bildirdi.
Kelissózder taqyryptarynyń biri QR azamattaryna vızalyq rejımdi jeńildetý máselesi boldy. Elshi osy másele boıynsha portýgaldyq tarapty Shengen aýmaǵy elderimen kópjaqty jáne ekijaqty kelissózder barysynda qolǵabys kórsetýge shaqyrdy.
Portýgalııaǵa sapar aıasynda Qazaqstan Elshisi Portýgalııa Assambleıasynyń depýtaty, EQYU Parlamenttik Assambleıasynyń burynǵy Prezıdenti Joze Soareshpen kezdesti. Taraptar qazaqstan-portýgal qatynasyn nyǵaıtýdaǵy parlamenttik dıplomatııanyń jáne eki memlekettiń zańnamalyq organdary arasyndaǵy yntymaqtastyqtyń mańyzdy rólin atap ótti. J. Soaresh Astananyń halyqaralyq beıbitshilik bastamalaryna qoldaý bildirip, Qazaqstandaǵy áleýmettik-ekonomıkalyq jáne demokratııalyq reformalaryna oń baǵasyn berdi.