Memleket basshysynyń ınfraqurylym baǵdarlamasy boıynsha josparlanǵan Úlken Almaty avtomobıl aınalma jolynyń qurylysy bastaldy. Uzyndyǵy 66 shaqyrymdy quraıtyn 6 jolaqty alyp jol tórt jylda salynyp bitpek. Jobanyń bastalýyna arnalǵan arnaıy is-sharaǵa QR Premer-Mınıstriniń Birinshi orynbasary Asqar Mamın qatysty.
Almatyny aınalyp ótetin avtomobıl joly I-tehnıkalyq sanat boıynsha salynady. Bul óz kezeginde Almaty qalasynyń aýmaǵyndaǵy qozǵalys aǵynyn azaıtýǵa, tranzıttik kólikter sanyn qysqartyp, ekologııalyq jaǵdaıdy jaqsartýǵa múmkindik beredi. Sondaı-aq joba úzdiksiz jáne qaýipsiz qozǵalysty qamtamasyz etedi. Oǵan qosa Eýropa men Azııa arasyn jalǵaıtyn avtokólik dálizimen júretin qozǵalysqa da dem bermek.
Quny 180 mlrd dollardy quraǵan jol qurylysyna 200-ge jýyq tehnıka men 3 myńnan astam jumys kúshi tartylady. Bir qýantarlyǵy, qurylysshylardyń 90 paıyzyn jergilikti azamattar quraıtyn bolady. Qurylys jumysyna beton, sement, qıyrshyq tas sııaqty túgeldeı derlik Otandyq ónimder qoldanylmaq. Úlken aınalma joldy salýǵa buǵan deıin elimizdegi Aqtóbe-Qostanaı, Beıneý-Atyraý, Almaty-Qordaı syndy úlken joldardyń qurylysyna qatysqan túrik jáne koreı kompanııalary jumyldyrylǵan.
«Úlken Almaty avtomobıl aınalma joly el ınfraqurylymynyń damýyna sony serpin beredi. Elbasynyń tikeleı tapsyrmasymen qolǵa alynǵan bul bastama memleket pen jekemenshik sektordyń seriktestigi arqyly júzege asyp otyrǵan eń aýqymdy jobalardyń biri. Sondyqtan, bul bárimizge úlken jaýapkershilik júkteıdi. Atalǵan jumystar transport salasyndaǵy úlken isterdiń bastamasy ǵana. Alda áli talaı mańyzdy ister kútip tur. Barshańyzdy qurylys jumysynyń bastalýymen quttyqtaımyn» dedi is-sharada sóılegen sózinde Asqar Mamın.
Sondaı-aq sharaǵa qatysqan QR Investısııalar jáne damý mınıstri Jeńis Qasymbek, Almaty oblysynyń ákimi Amandyq Batalov QR IDM Avtomobıl joldary komıtetiniń, «QazAvtoJol» UK» AQ Almaty fılıalynyń, «Almatyjollaboratorııa» RMK ókilderi atalǵan bastamanyń el ekonomıkasy úshin asa mańyzdy ekenine toqtalyp, qurylys jobasynyń eskızimen tanystyrdy.
Saltanatty shara aıaqtala salysymen mamandar men jumysshylar toby 50 aıǵa josparlanǵan alyp joldyń qurylysyna kirisip te ketti.
Arman OKTIаBR,
«Egemen Qazaqstan»
ALMATY