Almatyda О́ńirlik kommýnıkasııalar qyzmetiniń alańynda qalalyq Aýyl sharýashylyǵy jáne veterınarııa basqarmasy basshysynyń orynbasary Qarlyǵash Ábdijabbarovanyń qatysýymen «Almatyda agroónerkásip keshenin jáne azyq-túlik jetkizilimin damytý» taqyrybynda baspasóz máslıhaty ótti.
Almaty qalasy Aýyl sharýashylyǵy jáne veterınarııa basqarmasy bastyǵy orynbasarynyń aıtýynsha, azyq-túlikpen jabdyqtaý, eń aldymen, óńirlerden aýyl sharýashylyǵy ónimderin tikeleı jetkizýdi uıymdastyrýmen baılanysty. Apta saıynǵy qalalyq jármeńkelerde azyq-túlik ónimderi ortasha naryqtyq baǵadan 15-20% tómen satylady. Bul jergilikti aýyl sharýashylyǵy taýarlaryn óndirýshilerdi yntalandyrýǵa jáne áleýmettik mańyzy bar azyq-túlik taýarlaryna baǵa belgileýdi qamtamasyz etýge múmkindik beredi. Jyl basynan beri qalanyń 6 aýdanynda 230 jármeńke ótkizildi. Aqshalaı balamada bul 1,5 mlrd. teńgeni quraıdy.
Sonymen qatar, jylyjaı keshenderin salý arqyly óz óndirisin damytýǵa erekshe nazar aýdarylady. Osylaısha, bıylǵy jyly 5 myń tonna qýaty bar «BR BRAPK» JShS-niń 8 gektar jylyjaı keshenin keńeıtý josparlanyp otyr. Jobanyń quny – 8,3 mlrd. teńge. Sondaı-aq, 12 gektarǵa arnalǵan «GreenAgroKz» JShS 11,5 mlrd. teńge turatyn kókónis jylyjaıynyń qurylysy josparlanǵan.
Qarlyǵash Ábdijabbarovanyń aıtýynsha azyq-túlik qaýipsizdigimen qatar, áleýmettik mańyzy bar azyq-túlik taýarlarynyń baǵasynyń negizsiz ósýine jol bermeý baǵytynda jumys júrgizilýde. Baǵany turaqtandyrý maqsatynda «Altyn-Orda» kóterme ortalyǵymen 50 iri bólshek saýda obektilerine aýyl sharýashylyǵy ónimderin (pııaz, kartop, qyzylsha, sábiz) aralastyrý týraly kelisim jasaldy. Budan basqa, Almaty qalasynyń Turaqtandyrý qory bar. Satyp alý is-sharalary týraly sheshimge sáıkes 687,2 mln. teńgege azyq-túlik ónimderiniń bes túri satyp alyndy: qant, kúrish, makaron, 1 surypty un, qaraqumyq jáne ósimdik maıy.
Pılottyq rejımde maýsymaralyq maýsymda baǵany saqtaý úshin kókónis tańbalaý baǵdarlamasy (kartop, sábiz, pııaz) synaldy. «Almaty ÁKK» AQ jáne qalanyń saýda kásiporyndarynda kókónistiń satý baǵasyn belgilengen baǵamen satý boıynsha birlesken is-sharalardy júzege asyrdy. Jeliler aınalym kapıtalyn 500 mln. teńgege qamtamasyz etý maqsatynda, 1,1 mlrd. teńgege 10 myń tonna kókónis satyldy. Atalǵan is-sharanyń maqsatynda kartop 5,7%, sábiz 1,4% jáne pııaz baǵasy 9% deıin tómendedi.
Sonymen qatar, basqarmasy bastyǵynyń orynbasary azyq-túlik ónerkásibi damýynyń qarqyny jáne agroónerkásiptik keshendi memlekettik qoldaý tetikteri týraly áńgimelep berdi.
Ǵalym SÚLEIMEN,
ALMATY