Búgin saıası qýǵyn-súrgin qurbandaryn eske alý kúnine oraı, Semeıde birqatar iri sharalar legi uıymdastyryldy. Oblys ákiminiń orynbasary Ásem Núsúpova arnaıy kelip, Álıhan Bókeıhan bastaǵan alash qaıratkerleriniń rýhyna taǵzym etti.
- Bul kún biz úshin asa aýyr da qaıǵyly kún, mıllıondaǵan qurbandardyń kóz jasy men olardyń táýelsizdik jolyndaǵy kúresi eshqashan umytylmaq emes,-dedi oblys ákiminiń orynbasary Ásem Núsúpova,-1921-1954 jyldary burynǵy KSRO kóleminde sottalǵandardyń sany 3 mln 777 myńǵa jetken eken. Onyń ishinde Álıhan Bókeıhan, Ahmet Baıtursynuly, Júsipbek Aımaýytov sııaqty alash qaıratkerleri eń qatal jazaǵa kesildi. Bundaı qatań atý jazasy úkimine ilikkenderdiń sany 640 myń adam boldy.
Azap lagerlerinde qazaq ıntellıgensııasy kinásiz bolsa da, zardap tartyp jatty. Túrli ulttar jazyqsyz bolsa da, qazaq eline kúshtep jer aýdaryldy. Qazaq halqy sol zamanda basyndaǵy qaıǵysyna qaramastan syrttan kelgen jurtty baýyryna tartty. Soǵysta da, beıbit ómirde de túrli ulttardyń baýyrmaldyǵy qalǵan emes. Búgin, osyndaı aıtýly kúnde Semeı qalasyndaǵy Lenın kóshesi «Máńgilik el» bolyp aýysqanyn sizderge qurmetpen habarlaǵym keledi.
Osydan biraz jyl buryn osy Lenın kóshesin aýystyrý máselesi kópshiliktiń talqysyna túsken edi. Lenın kóshesiniń boıynda Álıhan Bókeıhan bastaǵan alash qaıratkerleri keletin Bostandyq úıi ornalasqan. Bostandyq úıinde qazir Semeıdegi oblystyq tarıhı ólketaný mýzeıi ashylǵan.
- Bizdiń kóshemiz Máńgilik el dep atalǵanyna halqym úshin qýanyp turmyn,-dedi mýzeı dırektory Lázzat Áljan,-bul jer Alash qaıratkerleriniń izi qalǵan qasıetti jer. Júregi qazaqpyn dep soqqan kimge de bolsyn ystyq. Barshańyzdy osy jaqsy jańalyqpen quttyqtaımyn! El birligi arta bersin.
Raýshan NUǴMANBEKOVA,
SEMEI