Bul týraly Aqordanyń baspasóz qyzmeti habarlady.
Rásimge qatysýshylarǵa arnalǵan sózinde Elbasy bıyl búkil elimiz boıynsha 140 myńnan astam stýdent joǵary oqý ornyn bitirip, dıplomdaryn alatynyn atap ótti.
– Búgin biz Qazaqstannyń eń úzdik oqý ornynyń túlekterine aq jol tileý úshin jınalyp otyrmyz. Nazarbaev Ýnıversıtetiniń tórtinshi jylǵy bitirýshilerin jáne elimizdegi barlyq oqý oryndarynyń túlekterin shyn júrekten quttyqtaımyn! – dedi Qazaqstan Prezıdenti.
Nursultan Nazarbaev bilim ekonomıkasy men ınnovasııalyq damýdy qalyptastyrý isindegi zertteý ýnıversıtetteriniń róli men mańyzyn erekshe atap ótti. Sondaı-aq, qysqa merzim ishinde Ýnıversıtet jańarýdyń sımvolyna jáne elimizdiń ǵylymı-zertteý, ınnovasııalyq jáne kadrlyq áleýetiniń ósý ortalyǵyna aınalǵanyn aıtty.
– Nazarbaev Ýnıversıtetiniń ǵalymdary halyqaralyq reıtıngi joǵary basylymdarda 1700-den astam maqala jarııalady. 36 patent alyndy. Korporatıvti demeýshiler ǵylymı zertteýlerge 40-tan astam grant bóldi. Ýnıversıtet ınnovasııalyq klasterdi tabysty qalyptastyrýdyń negizi boldy. Ǵylymı-tehnıkalyq qyzmet nátıjelerin kommersııalandyrý aıasynda 21 joba qoldaýǵa ıe boldy, – dedi Qazaqstan Prezıdenti.
Memleket basshysy ýnıversıtettiń odan ári tabysty damýy elimizdiń adamı kapıtalynyń artýyna septigin tıgizip, Qazaqstanda búkil Ortalyq Azııa óńiri aýqymyndaǵy tolyqqandy bilim berý habyn qalyptastyrýǵa múmkindik beretinin aıtty. Nursultan Nazarbaev qoıylǵan mindetterdi iske asyrý úshin osy joǵary oqý ornyna aldyńǵy qatarly zııatkerlik jáne ǵylymı resýrstardy jumyldyrý, óndiris pen kásipkerliktiń ınnovasııalyq mádenıetine baǵyttalǵan oqý baǵdarlamalaryna bet burý, sondaı-aq qashyqtyqtan bilim berý platformasyn damytý arqyly Ýnıversıtet jumysyn jandandyrýdy tapsyrdy.
– Ýnıversıtet elimizdiń ǵana emes, sondaı-aq alys jáne jaqyn shetelderdiń oqymystylaryn tartatyn ortalyqqa, jastardyń jobalaryn birlese júzege asyratyn orynǵa jáne Garvard, Korser, Han akademııasynyń onlaın-kýrstary úlgisimen bilim berýdiń ınternet-platformasyna aınalýǵa tıis, – dedi Qazaqstan Prezıdenti.
Nursultan Nazarbaev Astana ekonomıkalyq forýmynda kóterilgen jahandyq ózgeristerdiń bes megatrendi týraly aıtyp, eldiń aýqymdy ekonomıkalyq, saıası jáne rýhanı jańǵyrýyn júzege asyrý isindegi óskeleń urpaqtyń róline basa nazar aýdardy.
– Jańarǵan Qazaqstannyń kelbeti de, jańa formasııanyń urpaǵy da jáne muny ómirde iske asyratyn da sizder bolasyzdar. Sizderdiń kúsh-qýattaryńyz, bastamashyldyqtaryńyz, aqyl-oılaryńyz ben kreatıvti ustanymdaryńyz Otanymyzdyń tabysty damýynyń kepili sanalady. Sizder ózderińizdiń qaıtalanbas ómir joldaryńyzdy júrip ótkeli tursyzdar. Men sizderdiń árqaısyńyzdy maqtan tutamyn, – dedi Qazaqstan Prezıdenti.
Memleket basshysy úzdik dıplomdardy tapsyrý sátinde Nazarbaev Ýnıversıtetiniń oqytýshy-professorlar quramyn jáne túlekterdi taǵy da quttyqtap, olardyń óz ıdeıalaryn jemisti júzege asyrýyna tilektestik bildirdi.